काठमाडौँ । दाङबाट काठमाडौँ आउँदै गरेको यात्रुबाहक बस धादिङमा दुर्घटना भएको छ । पृथ्वी राजमार्गअन्तर्गत धादिङको बेनिघाट रोराङ गाउँपालिका–९ हुग्दीखोला नजिक भएको दुर्घटनामा २६ यात्रु घाइते भएका छन् ।

बाग्मती प्रदेश ०३–००१ ख २६७५ नम्बरको बस शनिबार बिहान पाँच बजेतिर अनियन्त्रित भई सडकको दाहिने किनारातर्फ पल्टिएर दुर्घटना भएको प्रहरीले बताएको छ । गम्भीर घाइतेको थप उपचारको लागि काठमाडौँ पठाइएको जिल्ला प्रहरी कार्यालय धादिङका प्रहरीले जनाएको छ ।

प्रहरीका अनुसार सल्यान सबेश्वरी–३ का २४ वर्षीय राजेन्द्र पुन, उनका छोरा ६ वर्षीय आशीष केसी र सल्यान जिल्ला बाघचौर नगरपालिका–१० का ५० वर्षीय मानबहादुर खड्काको अवस्था गम्भीर छ । दुर्घटना भएपछि प्रहरी र स्थानीयले उद्धार गरेका थिए ।