अनलाइन डबली
काठमाडौं । प्रधानमन्त्री प्रचण्डले जनयुद्धको क्रममा बेपत्ता पारिएका योद्धाहरुको पक्षमा काम सुरु गरेको बताएका छन् । उनले यसपटकको कार्यकालमा थोरै बोल्ने धेरै गर्ने संकल्प लिएको बताए ।
राष्ट्रिय बेपत्ता योद्धा स्मिति दिवसको अवसरमा काठमाडौंमा भएको कार्यक्ममालाई सम्बोधन गर्दै प्रचण्डले भने, “म अहिले धेरै बोल्दिन म प्रधानमन्त्री जस्तो भएर बोल्नुपर्ने हुन्छ । मैले बोल्ने भाषा विप्लव जीले बाहिरबाट बोलि रहनुभएको छ । यो पटक म भन्न चाँहि थोरै भन्ने काम चाँहिं धेरै गर्ने संकल्प लिएको छु । मैले प्रधानमन्त्री भएको दिन देखि त्यो गरिरहेको छु ।”
पहिलो पटक प्रधानमन्त्री हुँदाको निर्णय खोजेर राजपत्रमा प्रकाशित गरेको बताउँदै प्रचण्डले जनयुद्धमा मारिएका योद्धाहरूलाई हल्ला नगरिक राष्ट्रिय सहिद घोषणा गरेको र विभिन्न विरोधका बाबजुत पनि आफुले पुनः हल्ला नगरिकनै जनयुद्ध दिवसलाई राष्ट्रिय दिवसको रुपमा मनाउँने निर्णय गरेको बताए ।
२०७१ मा भएको निर्णय अनुसार आफुले सरकार प्रमुखको हैसियतले जनयुद्धका योद्धाहरूलाई दुई लाख दिन गरेको निर्णयको अनावश्यक विरोध भएको बताउदै सो विषयमा सर्वाच्च अदालले पुनः राहत दिने बाटो खोल्ने छ भन्ने विश्वास व्यक्त गरे ।
जसका निम्ति माओवादी आन्दोलनका सम्पूर्ण धाराहरु एक भएर सचेतता पूर्वक लाग्नुपर्नेमा प्रधानमन्त्री प्रचण्डको जोड थियो। प्रचण्डले बेपत्ता योद्धाहरुको छानबिनको कुरा र शान्ति प्रक्रियाको काम अन्तिम चरणमा रहेको जानकारी दिए ।
संक्रमणकालिन न्यायको विषयमा सत्ता गठबन्धनमा राम्रो बुझाई रहेको बताउनुभयो । साथै, विपक्षका दलका नेताहरु पनि कोलम्बियाको भ्रमण गरेर द्धन्द्धलाई शान्तिका कसरी परिणत गरिएको थियो भन्ने सिकेर आएको बताउनुहुँदै प्रधानमन्त्री प्रचण्डले शान्ति प्रक्रियाका बाँकी काम छिट्टै टुंग्याउने गरी आफु लागेको बताए ।
संसदमा रहेका सबै दलसँग सहमति गरी समिति तथा उपसमितिहरु बनाएर छलफल भैरहेको बताउनुहुँदै प्रधानमन्त्री प्रचण्ड सो प्रक्रिया दुई वर्षभित्र टुंग्याउने गरी आफु लागेको बताए ।
शान्ति प्रक्रियाको काम निकै ढिलो भएको भन्दै बेपत्ताहरुलाई जिउँदो रुपमा पाउन मुस्किल हुने बताउँदै प्रधानमन्त्री प्रचण्डले बेपत्ता योद्धाहरुलाई शहिद घोषणा गरेर परिवारलाई परिपुरणको व्यवस्था गर्न उचित हुने तर्फ आफ्नो ध्यान गएको बताए ।
“पहिले पहिले मलाई बेपत्ता योद्धाहरु हुनुहुन्न होला भनेको सुन्दा त्यो भन्नेलाई झम्टौं झम्टौं जस्तो हुन्थ्यो । अहिले ती योद्धाहरुलाई बेपत्ता भन्नु भन्दा पनि उहाँहरुको स्थिति सार्वजनिक गरी सहिद घोंषणा गर्दा चित्त बुझाउने ठाउँमा पुगेको छु । मलाई लाग्छ हामी सबै त्यो अवस्थामा पुगेका छौं” प्रचण्डले भने ।
डण्डपानी न्यौपाने लगायतका बेपत्ता योद्धाहरुको अवस्था बारे जनयुद्ध कालमै मानव अधिकारकर्मीहरुले प्रधानमन्त्री कृष्ण प्रसाद भट्टराईसँग बुझ्न खोज्दा उहाँहरु पहिल्यै मरिसक्नु भयो भनेको र आफुहरुले सो कुरो अस्वीकार गरेको स्मरण गर्दै प्रचण्डले अब समय धेरै घर्किसकेको बताए ।
कार्यक्रममा नेपाल कम्युनिस्ट पार्टीका महासचिव विप्लव, एमाले नेता प्रदीप ज्ञावाली, नेपाली कांग्रेसका नेता तथा सचेतक रमेश लेखक, नेपाल समाजवादीकी नेतृ हिसिला यमी, आम जनता पार्टीका उपाध्यक्ष तिलक थापा लगायतका नेताहरुले सम्बोधन गरेका थिए ।
