अनलाइन डबली
काठमाडौँ । घटेको हवाई भाडाबाट आज बाट लागु हुने भएको छ । वायुसेवा संचालक संघले मंगलबार हवाई भाडा घटाएको थियो । सरकारले पेट्रोलियम पदार्थको मूल्य घटाएसँगै हवाई भाडा घटेको हो ।
सरकारले हवाई इन्धनको मूल्यमा प्रतिलिटर १० रुपैयाँ घटाएको थियो । वायुसेवा सञ्चालक सङ्घका अनुसार काठमाडौँबाट धनगढीको उडानमा सबैभन्दा धेरै ४४० रुपैयाँ भाडा घटेको छ । यसअघि यो रुटमा यात्रुले हवाई इन्धनका लागि मात्र ७ हजार ५१० रुपैयाँ तिरिरहेकोमा अब ७ हजार ७० रुपैयाँ तिरे पुग्नेछ ।
काठमाडौँबाट हुने माउन्टेन फ्लाइटमा ३४५ रुपैयाँले भाडा घटेको छ । अब माउन्टेन फ्लाइटको अधिकतम भाडा ५ हजार ४९० रुपैयाँ कायम भएको छ । काठमाडौँबाट भद्रपुरका लागि ३०० रुपैयाँ भाडा घटेको छ । विराटनगरलाई २४०, जनकपुरका लागि १३०, भरतपुरका लागि १०५ र पोखराका लागि १५५ रुपैयाँ हवाई भाडा घटेको छ ।
काठमाडौँबाट भैरहवा उडानको भाडा २०५ रुपैयाँले घटेर ३ हजार २९५ रुपैयाँ कायम भएको छ । नेपालगन्जमा ३२५, तुम्लिङटारका लागि १८५, सिमराका लागि ९० रुपैयाँ, सुर्खेतका लागि ३४५ र राजविराजका लागि २०५ रुपैयाँ भाडा घटेको छ । यो भाडादर आजैदेखि लागू हुनेछ ।
सार्वजनिक यातायात व्यवसायीले भने अहिलेसम्म भाडा घटाउनेबारे छलफल नै गरेका छैनन् । यातायात व्यवस्था विभागले पनि पेट्रोलियम पदार्थको मूल्य १० रुपैयाँसम्म घट्दा समेत व्यवसायीहरुलाई भाडा घटाउनेबारे छलफल समेत गरेको छैन ।
