अनलाइन डबली
काठमाडौं । सेतो मच्छिन्द्रनाथकाे रथ तान्ने जात्राको आज दोस्रो दिन । चैते दशैंको दिनदेखि रथ तान्न सुरु गरिएको हो ।तीनधारा पाठशालाअघि ३२ हात लामो रथ बनाएर तान्ने गरिएको छ ।
हरेक वर्ष यो जात्रा गरेपछि वर्षा र सह हुने विश्वास छ । रथ दोस्रो दिन आज असनबाट वसन्तपुरमा रहेकाे कालभैरवअघि लगिन्छ । बेलुका ५ बजेदेखि असन, बालकुमारी, केल टोल, इन्द्रचोक मखन हुँदै हनुमान ढोकासम्म रथ यात्रा हुनेछ ।
सेतो मच्छिन्द्रनाथ रथ व्यवस्थापन समितिका अनुसार तेस्रो दिन वसन्तपुरबाट लगन लगेर जात्रा गर्ने परम्परा छ । भोलि दिउँसो ४ बजेदेखि हनुमानढोका, चिङ्कमुगल, जैशीदेवल, ज्याबहाल हुँदै लगनसम्म रथयात्रा हुनेछ ।
त्यस्तै, पर्सि बेलुका लगन आमा रुख परिक्रमा, चैत १९ गते बेलुका लगन, ज्याबहाल, द्यः लं, युतुननी, कोहिती भीमसेन थान, मरु, यट्खा, नरदेवि, किलागल, भेडासिङ, केलटोल हुँदै मच्छिन्द्रबहालसम्म रथयात्रा हुने कार्यक्रम रहेको छ ।
लगनमा सेतो मच्छिन्द्रनाथको आमाको मन्दिरमा रथ तीनपटक घुमाउने गरिन्छ । काठमाण्डौमा मनाइने सेतो मच्छिन्द्रनाथको रथयात्रा सकेपछि ललितपुरमा रातो मच्छिन्द्रनाथको रथयात्रा हुन्छ।
हिजो राति राष्ट्रपति रामचन्द्र पौडेलले मच्छिन्द्रनाथको रथको दर्शन गरेका छन् । राति ९ बजे असन पुगेर पौडेलले दर्शन गरेका हुन् ।
