अनलाइन डबली
काठमाडौं । नेकपा (माओवादी केन्द्र)को भातृ संगठन अखिल (क्रान्तिकारी)ले आगामी स्ववियु चुनावलाई लक्षित गर्दै घोषणापत्र लेख्न सुझाव संकलन गरेको छ । काठमाडौंको रत्नराज्यलक्ष्मी क्यापसमा सबै संकायका उपत्यकाका विद्यार्थीहरुलाई बोलाएर घोषणापत्रमा समेट्ने विषयका सुझाव लिएको हो ।
आगामी चैत ५ गतेको स्ववियु चुनावलाई लक्षित गर्दै घोषणापत्रमा समेट्ने विषयमा सुझाव लिएको अखिल क्रान्तिकारीका प्रवक्ता मिलन एमसीले बताए । ‘विद्यार्थी संगठन र स्ववियु शिक्षाका मुद्दाबाट टाढिएको भन्ने गुनासो धेरै आयो । हामीले कुन कुन मुद्दा उठाउनुपर्छ भन्ने के के काम गर्नुपर्छ भन्ने विषयमा सबै विद्यार्थीको सुझाव लियौँ’ रातोपाटीसँग कुरा गर्दै एमसीले भने, ‘सबै विद्यार्थी साथीहरुले रचनात्मक सुझाव दिनु भएको छ । हामीले ती सबै मुद्दालाई समेट्ने प्रयत्न गर्ने छौं ।’
हरेक क्याम्पसमा स्ववियुलाई प्रभावकारी बनाउन विद्यार्थीहरुसँग सुझाव लिएको एमसीले बताए । विद्यार्थी आन्दोलन र स्ववियुलाई फरक ढंगले लग्न नसेमा अस्तित्व नै संकट आउने देखिएपछि सबैपक्षसँग सुझाव लिन प्रयत्न गरिएको बताए ।
स्ववियु चुनावको घोषणापत्रमा समेट्ने विषयमा प्राध्यापक, विषय विज्ञ लगायतसँग छलफल गरेर सुझाव लिने तयारी गरिएको एमसीले बताए । अखिल क्रान्तिकारीले पहिलो पटक घोषणापत्रमा समेट्ने विषयमा सुझाव लिएको हो ।
