काठमाडौं । बैंकहरुको नाफा घट्ने भएपछि राष्ट्र बैंक स्प्रेडदरमा खुम्चिएको छ ।
केन्द्रीय बैंकले बुधबार नेपाल राष्ट्र बैंकबाट इजाजतपत्र प्राप्त क, ख र ग वर्गका बैंक तथा वित्तीय संस्थालाई जारी गरिएको एकीकृत निर्देशन, २०७८ संशोधन गर्दै मौद्रिक नीतिले तोकेको औसत ब्याजदर अन्तर (स्प्रेडदर) असार २०८० बाटमात्र कार्यान्वयनमा जाने जनाएको हो ।
बैंकले आर्थिक वर्ष २०७९/८० को मौद्रिक नीतिको पहिलो त्रैमास समीक्षा गर्दै वाणिज्य बैंकको साविकको ४.४ प्रतिशतको स्प्रेडदरबाट ०.४ प्रतिशत घटाउँदै ४ प्रतिशत र विकास बैंक र वित्त कम्पनीको औसत ब्याजदर अन्तर ५ प्रतिशतबाट ४.६ प्रतिशत कायम गर्ने जनाएको थियो तर, राष्ट्र बैंकले यस्तो नीति अर्को आर्थिक वर्षबाट मात्र लागू गरिने जनाएको छ ।
बरु, ०.४ प्रतिशतले स्प्रेडदर घटाउने आफ्नै निर्णयबाट पछि हट्दै राष्ट्र बैंकले चैतबाट ०.२ प्रतिशतसम्म मात्रै घटाउने जनाएको छ । एकीकृत निर्देशन २०७८ लाई संशोधन गर्दै राष्ट्र बैंकले २०७९ चैत महिनाबाट बैंक तथा वित्त कम्पनीहरुले औसत ब्याजदर अन्तर क्रमशः ४.२ प्रतिशत र ४.८ प्रतिशत कायम गर्नुपर्ने बताएको हो ।
