बुटवल । लुम्बिनी प्रदेश सरकारमा नेकपा माओवादी केन्द्रको नेतृत्वमा सरकार बन्ने पक्का भएको छ । चार दलीय गठबन्धनका ४२ जना सांसदको हस्ताक्षर गरेर माओवादी केन्द्रका प्रदेशसभा दलका नेता कुलप्रसाद केसी ‘सोनाम’ लाई मुख्यमन्त्रीमा समर्थन गरेका छन् ।
प्रदेश प्रमुख अमिश शेरचनले दिएको समय सीमा भित्रै ४२ जना सांसदको हस्ताक्षर बुझाइएको हो । गठबन्धनका संयोजक एवम् कांग्रेस संसदीय दलका नेता विरेन्द्र कनोडियाले प्रदेश प्रमुख शेरचनलाई हस्ताक्षर बुझाएका बुधबार दिउँसो हस्ताक्षर बुझाएका हुन् ।
गठबन्धनमा हृदयश त्रिपाठी समूहमा रहेका अजय शाही समेत मिसिएका छन् । उनले पनि केसीलाई समर्थन गर्दै हस्ताक्षर गरेका छन् । सूर्य चुनाव चिह्न लिएर चुनाव जितेका त्रिपाठी केपी शर्मा ओली नेतृत्वको सरकारमा मन्त्री थिए ।
लुम्बिनी प्रदेशमा गठबन्धनको तर्फबाट केसीको पक्षमा स्पष्ट बहुमत देखिएकोले प्रदेश प्रमुख शेरचनले सोनामलाई आजै मुख्यमन्त्री नियुक्त गर्नेछन् । आजै सपथ ग्रहण गरेर सानो आकारको मन्त्रिपरिषद गठन गर्ने केसीको तयारी छ ।
लुम्बिनी प्रदेशमा कांग्रेस र माओवादी केन्द्रबीच आठ–आठ महिना सरकारको नेतृत्व गर्ने सहमति भएको छ ।
जनयुद्धमा जनमुक्ति सेनाको कमाण्डर समेत रहेका केसीले आजै सानो आकारको मन्त्रिपरिषद् गठन गर्ने तयारी गरेका छन् ।
मुख्यमन्त्रीसँगै माओवादी केन्द्रबाट एकजना, नेपाली कांग्रेसबाट एकजना र जसपाबाट तीन जनालाई समेटेर मन्त्रीहरुको नियुक्ति र सपथ आजै गर्ने तयारी भाइरहेको छ । विश्वासको मत लिएपछि पूर्ण आकारको मन्त्रिपरिषद् विस्तार गर्ने गरी आज मुख्यमन्त्री सहित ६ जनाको मन्त्रिमण्डल बनाउने तयारी भइरहेको छ ।
