काठमाडौं । निषेधाज्ञा खुकुलो भएसँगै फेरि कोरोना भाइरस संक्रमण बढ्न थालेको छ । केही दिन लगातार संक्रमण बढेसँगै अस्पतालका आईसीयू र भेन्टिलेटर भरिन थालेका छन् ।
स्वास्थ्य तथा जनसंख्या मन्त्रालयका अनुसार विहीबार ३ हजार ३६५ जना नयाँ संक्रमित थपिएका थिए । कोरोना संक्रमण फेरि बढ्न थालेपछि कसरी रोकथाम र नियन्त्रण गर्नेबारे स्वास्थ्य मन्त्रालयका अधिकारीहरु छलफलमा जुटेका छन् ।
यसैबीच कोरोना संक्रमण लगातार बढ्न थालेपछि कोभिड–१९ संकट व्यवस्थापन केन्द्र (सीसीएमसी) को बैठक बस्दै छ । आज अपरान्ह ४ बजे सिंहदरबारमा सीसीएमसीको बैठक बस्न लागेको हो । प्रधानमन्त्री शेरबहादुर देउवाले पहिलो पटक सीसीएमसीको बैठक बोलाएका हुन् ।
पछिल्ला दिनमा लगातार संक्रमित थपिँदा अस्पतालका आइसीयू र भेन्टिलेटर भरिन थालेको भन्दै स्वास्थ्य तथा जनसंख्या मन्त्रालयले स्वास्थ्य मापदण्डको पालना गर्न आग्रह गरेको छ ।
नेपालमा कोरोनाको नयाँ भेरियान्ट पुष्टि भइसकेको र काठमाडौँसहित देशभर निषेधाज्ञा पनि खुकुलो बनाइएकोले तेस्रो लहर आउन सक्ने विज्ञहरुले बताएका छन् । उनीहरुले सतर्क रहन सबैलाई आग्रह समेत गरेका छन् ।
