काठमाडौं । सत्तारुढ नेपाल कम्युनिस्ट पार्टी (नेकपा) ले विवादित मिलेनियम च्यालेन्ज कर्पोरेसन (एमसीसी)लाई संसदमा अनुमोदन गर्ने निर्णय गरेको छ । डेढ महिनापछि शुक्रबार बसेको स्थायी समिति बैठकले संशोधन र परिमार्जन गरेर एमसीसी अनुमोदन गर्ने निर्णय गरेको हो ।
बैठकपछि प्रवक्ता नारायणकाजी श्रेष्ठले एमसीसीलाई आवश्यकता अनुसार संशोधन र परिमार्जन गरेर पारित गर्ने निर्णय गरेको संचारकर्मीलाई जानकारी दिए । उनका के संशोधन र परिमार्जन गर्ने भन्ने विषयमा वरिष्ठ नेता झलनाथ खनाल नेतृत्वको समितिको सुझावका आधारमा काम हुने पनि जानकारी दिए ।
त्यसैगरी बैठकले पार्टीको महाधिवेशनको मिति तय गरेको छ । प्रवक्ता श्रेष्ठले आगामी चैत २५ गतेदेखि ३० गतेसम्म काठमाडौंमै महाधिवेशन गर्ने निर्णय गरेको जानकारी दिए । महाधिवेशनको तयारीका सम्बन्धमा छलफलका लागि २०७७ कात्तिक १५ गतेदेखि १७ गतेसम्मका लागि केन्द्रीय समिति बैठक बोलाउने निर्णय पनि बैठकले गरेको छ ।
त्यसैगरी बैठकले दुबै अध्यक्षको कार्यविभाजन पनि गरेको छ । अध्यक्ष ओलीले सरकार र प्रचण्डले पार्टी संचालन गर्ने निर्णय पनि बैठकले गरेको छ । पार्टीले सरकारको कामकारवाहीमा हस्तक्षेप नगर्ने निर्णय समेत बैठकले गरेको एक स्थायी समिति सदस्यले जानकारी दिए ।
बैठकले सरकारका दैनिक काममा पार्टीले हस्तक्षेप नगर्ने तर राष्ट्रिय महत्वका निर्णय लिनुपर्दा पार्टीको मार्ग निर्देशनलाई ध्यानमा राखेर काम गर्ने निर्णय पनि बैठकले गरेको छ । पार्टी एकताको ऐतिहासिक महत्वलाई आत्मसाथ गर्दै पार्टीलाई अझ बढी सुदृढ गरेर अगाडि बढाउने,पार्टीलाई विधि र पद्धतिमा सञ्चालन गर्ने कुरामा दृढतापूर्वक अगाडि बढ्ने र विगतमा भएका निर्णय कार्यान्यन गर्ने निर्णय गरेको छ ।
असार १० गते सुरु भएर स्थगित भएको बैठक भदौ २६ गते पुगेर सम्पन्न भएको छ । बैठक सुरु भएलगत्तै अधिकांश स्थायी समिति सदस्यहरुले अध्यक्ष तथा प्रधानमन्त्री केपी शर्मा ओलीको कार्यशैलीलाई लिएर चर्को आलोचना गरेका थिए ।
स्थायी समिति सदस्यहरुले बैठकमा बोल्दै ओलीले पार्टी अध्यक्ष र प्रधानमन्त्री दुबैबाट राजिनामा दिनुपर्ने माग राखेका थिए । त्योसँगै नेताहरु दुई समूहमा विभाजित भएका थिए । यसप्रति तीब्र असहमति जनाउँदै ओलीले बैठकमा आउन छोडे । ओली र प्रचण्ड–नेपाल समूह पार्टीमा बहुमत पुर्याउनतिर लागे ।
दुबै समूहले केन्द्रीय समिति र संसदीय दलम बहुमत जुटाउन लागेपछि झण्डै पार्टी फुटको डिलमा पुगेको थियो । फुटलाई स्वीकार गर्ने भन्दै ओलीले प्रचण्ड र नेपाललाई जे मन लाग्छ गर भन्दै एकलौटी रुपमा स्थायी समिति बैठक स्थगित गरेका थिए । त्यसपछि अवरुद्ध बैठक आज सम्पन्न भएको हो ।
