काठमाडौँ । पहिचानसहितको अधिकारको लागि सं घर्ष गर्दै आएका विभिन्न ९ वटा संगठनहरुले आन्दोलनका कार्यक्रम घोषणा गर्दैछन् । जेलमा रहेका सांसद रेशम चौधरीको रिहाई, नागरिकता विधेयकलगायत पहिचानसहितको अधिकारको लागि नयाँ कार्यक्रम घोषणा गर्न लागिएको छ ।
कुमार लिङ्देन नेतृत्वको संघीय लोकतान्त्रिक राष्ट्रिय मञ्च, लक्ष्मण थारु नेतृत्वको थारुहट राष्ट्रिय मोर्चा,आरके खम्बु नेतृत्वको खम्बुवान राष्ट्रिय मोर्चा, मगरात, खस आर्यलगायतका ९ ओटा ‘पहिचानमा आधारित संघीय गठबन्धमा आबद्ध दल तथा संघ संगठनहरु’ ले नयाँ कार्यक्रम घोषणा गर्न लागेका हुन् ।
तराईको थारुहरु, पूर्वी पहाडको खम्बु–लिम्बु, मगरातका मगर, पश्चिमका खस आर्यहरु एउटै मोर्चामा सभागी भएका छन् । सबैले आआफ्नो पहिचानको लागि सं घर्ष गरेपनि निष्कर्षमा पुग्न नसकेको समिक्षा गर्दै गठबन्धन बनाएका छन् ।
सरकारले जबरजस्त पेलेर संविधान जारी गरेको भन्दै असन्तुष्ट बन्दै आएका यी समुदायले निर्णयक सं घर्षमा जाने निर्णय गरेका छन् । केही दिन पहिले संयुक्त रुपमा पहिचानको लागि सडकमा जाने सहमति गरेका यी संगठनहरुले आज नयाँ कार्यक्रम घोषणा गर्दैछन् । संविधान जलाउनेसम्मका कार्यक्रम गर्दै आएका उनीहरुको अबका कार्यक्रम कस्ता हुन्छन् पत्रकार सम्मेलनमा पछि मात्रै जानकारी हुनेछ ।
