अनलाइन डबली
काठमाडौं । काठमाडौं स्थित चिनियाँ दूतावासले चीनले नेपाललाई बाढीको पूर्वसूचना नदिएको भन्ने आरोपको कडा रूपमा खण्डन गरेको छ । दूतावासले सामाजिक सञ्जाल फेसबुक मार्फत एक स्पष्टीकरण जारी गर्दै ती आरोपहरूलाई ‘भ्रामक समाचार’को संज्ञा दिएको हो ।
चीनतर्फको कुनै बाँध फुटेर नेपालमा क्षति पुगेको र त्यसको जानकारी नेपाललाई नदिएको भन्ने दाबीलाई दूतावासले निराधार बताएको छ । दूतावासले सार्वजनिक गरेको तथ्यअनुसार, अगस्ट २६ को बिहान नेपालतर्फ नै भूकम्प वा हिमपहिरो जस्तै प्रकृतिको ठूलो भौगोलिक विपद् आएको थियो ।
सोही घटनाका कारण केरुङ –रसुवागढी सीमा क्षेत्रमा भीषण लेदोसहितको पहिरो गएको थियो । यस प्राकृतिक विपद्का कारण नेपालतर्फ मात्र नभई चीनतर्फ पनि उत्तिकै क्षति भएको र धेरै मानिसहरू बेपत्ता भएको दूतावासले उल्लेख गरेको छ ।
दूतावासले विपद्को यस कठिन घडीमा मिथ्या आरोप लगाउनुको सट्टा आपसी सहयोग र सहकार्यमा जोड दिनुपर्ने बताएको छ । दूतावासद्वारा जारी सन्देशमा भनिएको छ, ‘आरोपले केही मद्दत गर्दैन, बरु सहकार्यले मात्र मानिसको ज्यान बचाउन सकिन्छ ।’ संकटको समयमा दुवै देशले मिलेर उद्धार र राहतमा लाग्नुपर्नेमा दूतावासले जोड दिएको छ ।
