अनलाइन डबली
काठमाडौं । पोर्चुगलका फुटबल स्टार क्रिस्टियानो रोनाल्डोले आफ्नी लामो समयदेखिकी प्रेमिका जर्जिना रोड्रिग्वेजसँग विवाह गरेका छन् । रोनाल्डोले मंगलबार आफ्नो आधिकारिक इन्स्टाग्राममार्फत जर्जिनासँग हात समातेको र दुवैले औंठी लगाएको तस्वीर सार्वजनिक गर्दै विवाहको पुष्टि गरेका हुन् ।
रोनाल्डो र जर्जिना लामो समयदेखि प्रेम सम्बन्धमा थिए । उनीहरूका सन्तानसमेत छन् । यद्यपि, उनीहरूको विवाहबारे लामो समयदेखि विभिन्न चर्चा हुँदै आए पनि रोनाल्डोले सामाजिक सञ्जालमार्फत पहिलोपटक औपचारिक रूपमा पुष्टि गरेका हुन् ।
रोनाल्डोले हालै २०२६ को फिफा विश्वकपमा पोर्चुगलको प्रतिनिधित्व गरेका थिए । उक्त विश्वकप उनको करियरको अन्तिम विश्वकप बनेको छ । स्पेनसँगको अन्तिम १६ को खेलमा पोर्चुगल १–० ले पराजित भएपछि प्रतियोगिताबाट बाहिरिएको थियो । स्पेनका मिकेल मेरिनोले खेलको निर्णायक गोल गरेका थिए ।
पोर्चुगलका रोनाल्डो, ब्रुनो फर्नान्डेसलगायत खेलाडीले गोलका अवसर सिर्जना गरे पनि त्यसलाई सदुपयोग गर्न नसक्दा टोली क्वार्टरफाइनल पुग्न असफल भएको थियो ।
स्पेनसँगको खेलअघि नै रोनाल्डोले २०२६ को विश्वकप आफ्नो अन्तिम विश्वकप हुने बताएका थिए । त्यससँगै विश्वकपमा उनको २० वर्ष लामो यात्रा पनि समाप्त भएको छ । रोनाल्डोले सन् २००६ मा पहिलोपटक विश्वकप खेलेका थिए । त्यस संस्करणमा पोर्चुगल चौथो भएको थियो। सन् २०१० मा अन्तिम १६, २०१४ मा समूह चरण, २०१८ मा अन्तिम १६ र २०२२ मा क्वार्टरफाइनलसम्म पोर्चुगल पुगेको थियो ।
विश्वकपमा रोनाल्डोले कुल २७ खेल खेलेका छन्, जुन कुनै पनि खेलाडीको दोस्रो सर्वाधिक संख्या हो। उनले विश्वकपमा ११ गोल गरेका छन् । २०२६ को विश्वकपमा भने उनले पाँच खेलमा तीन गोल गरेका थिए ।
विश्वकपको उपाधि जित्न नसके पनि रोनाल्डोले क्लब फुटबलमा भने लामो र सफल करियर बनाएका छन् । विश्वकपको अन्तिम खेलपछि उनको व्यक्तिगत जीवनमा पनि नयाँ अध्याय सुरु भएको छ । एएनआई
