अनलाइन डबली
काठमाडौं । नेकपा (एमाले)की सांसद साजिदा खातुन सिद्धिकीले सरकारको १०० दिने कार्यकालमा उपलब्धिभन्दा कमजोरी र विवादका विषय बढी देखिएको टिप्पणी गरेकी छन् ।
हनिमुन पिरियड सिद्धिँदै गर्दा सरकारका उपलब्धि र कमजोरीलगायत समसामयिक राजनीतिक विषयमा अन्तक्र्रिया कार्यक्रममा बोल्दै उनले सरकारको योजना निर्माण र कार्यान्वयन प्रभावकारी हुन नसकेको बताइन् ।
सिद्धिकीले संसद्मा प्रधानमन्त्रीले दिएको नेपाल–भारत सीमा सम्बन्धी अभिव्यक्तिप्रति असन्तुष्टि जनाउँदै त्यसले राष्ट्रिय तथा अन्तर्राष्ट्रिय तहमा बहस सिर्जना गरेको बताइन् ।
‘यदि देशको प्रधानमन्त्रीले नेपाल र नेपालीलाई सुरक्षित राख्न सक्नुहुन्न, राष्ट्रिय स्वाभिमानको रक्षा गर्न सक्नुहुन्न भने राजीनामा दिएर जानुस्, हामीलाई केही फरक पर्दैन,’ उनले भनिन् ।
सुकुम्बासी तथा भूमिहीन नागरिकको व्यवस्थापनमा सरकार असफल भएको आरोप लगाउँदै उनले डोजर प्रयोग गरेर बस्ती हटाउनु समाधान नभएको बताइन् । प्रभावित नागरिकहरू अहिले पनि होल्डिङ सेन्टरमा कष्टकर जीवन बिताउन बाध्य रहेको उनको भनाइ थियो ।
‘साँच्चिकै सुकुम्बासीलाई व्यवस्थित बसोबासको व्यवस्था गर्नुपर्ने थियो। तर सरकारले डोजर चलाएर बस्ती भत्कायो, होल्डिङ सेन्टरमा राख्यो, तर दीर्घकालीन समाधान दिन सकेन,’ सिद्धिकीले भनिन् ।
उनले सरकारले मानव अधिकार, महिला अधिकार, बालअधिकार तथा ज्येष्ठ नागरिकका अधिकारको संरक्षण गर्न नसकेको आरोप समेत लगाइन् ।
अर्थतन्त्रतर्फ संकेत गर्दै सिद्धिकीले सरकारले ऋण, कर तथा भ्याटको भार बढाएको आरोप लगाइन् । शिक्षा, स्वास्थ्यलगायतका क्षेत्रमा पनि सरकारको नीति प्रभावकारी हुन नसकेको उनको भनाइ थियो ।
‘जहिले पनि पर्फेक्ट रिजल्ट ल्याउन पर्फेक्ट प्लान चाहिन्छ । तर सरकारको योजना र कार्यान्वयनबीच तालमेल देखिएको छैन,’ उनले भनिन् ।
सिद्धिकीले विपक्षी दलको भूमिका सरकारका कमजोरी औंल्याउने र जनताका आवाज उठाउने भएको उल्लेख गर्दै सरकारलाई कमजोरी सच्याएर परिणाममुखी काम गर्न आग्रह गरिन् ।
