काठमाडौं । संयुक्त जेनजी आन्दोलनका सह–संयोजक अजय सोडारी र डा.जगत विकको टोलीले जेन्जि आन्दोलनसम्बन्धी प्रतिवेदन तत्काल सार्वजनिक गर्न जाँचबुझ आयोगलाई ध्यानाकर्षण पत्र बुझाएका छन् । सोमबार सिंहदरबार स्थित जेन्जि आन्दोलन सत्य–तथ्य जाँचबुझ आयोगका अध्यक्ष गौरि बहादुर कार्कीलाई भेटी सरकार समक्ष आफ्ना मागहरु सम्बोधनका लागि पहल गरिदिनसमेत आग्रह गरेका छन् ।

११ दिनसम्म अनसन बसेका सोडारीले २०८२ भाद्र २३ र २४ गते सम्पन्न जेन्जि आन्दोलनसँग सम्बन्धित घटनाहरूको सत्यतथ्य छानबिन गरी निस्पक्ष, वस्तुनिष्ठ र पारदर्शी ढङ्गले प्रतिवेदन तयार गरी सार्वजनिक गर्ने जिम्मेवारी आयोगको रहेको र सोलाई तत्काल बाहिर ल्याउन आग्रह गरेको अनलाई डबलीसँग बताए ।

आयोग अध्यक्षलाई बुझाएको पत्रमा भनिएको छ,“आयोगबाट कुनै प्रकारको ढिलासुस्ती नहोस् भन्ने हाम्रो स्पष्ट र दृढ आग्रह छ । साथै, आयोगले कुनै पनि प्रकारको आग्रह–पूर्वाग्रह, राजनीतिक दबाब वा प्रभावबाट मुक्त भई पूर्ण निष्पक्षता र न्यायको मर्मलाई आत्मसात् गर्दै छानबिन प्रक्रिया अगाडि बढाओस् भन्ने हाम्रो जोडदार माग रहेको छ ।”

देशमा जसले जे गरे पनि हुन्छ भन्ने भाष्यविरुद्ध पनि प्रतिवेदन सार्वनिक गर्नु पर्ने उल्लेख गर्दै भनिएको छ, “राज्य र देश दण्डहीनताको दिशामा अग्रसर हुनु लोकतन्त्रका लागि गम्भीर खतरा हो । घटनाको यथार्थ छिनोफानो नगरी तथा दोषी पहिचान र जवाफदेहिता सुनिश्चित नगरी निर्वाचन प्रक्रियातर्फ अघि बढ्नु आन्दोलन र जेन्जि आन्दोलनका जायज मागमाथि अर्को अन्याय र हाइज्याकसरह हुनेछ ।

यसले जनभावनामा थप आघात पु¥याउने र राजनीतिक असन्तोषलाई गहिरो बनाउने सम्भावना रहन्छ त्यसैले चुनाव भन्दा पहिला आयोगको प्रतिवेदन सत्यतथ्य सार्वजनिक गर्न अनुरोध गर्दछौ ।”

साथै पत्रमा भनिएको छ,“संयुक्त जेन्जि आन्दोलन आफ्ना माग र मुद्दामा निरन्तर अडिग रहँदै स्पष्ट रूपमा उल्लेख गर्दछ कि ःसत्यतथ्य छानबिन, न्यायपूर्ण निकास र त्यसपछिमात्र निर्वाचन हाम्रो मुख्य बटमलाइन हो ।
न्यायभन्दा माथि कुनै राजनीतिक कार्यसूची हुन सक्दैन ।

अतः जेन्जि आन्दोलनसम्बन्धी सत्यतथ्य छानबिन प्रतिवेदन यथाशीघ्र सार्वजनिक गरी न्यायको प्रत्याभूति गराइदिनुहुन हार्दिक अनुरोध गर्दछौं । साथै, ११ दिने सत्याग्रह कार्यक्रममार्फत हामी शान्तिपूर्ण र लोकतान्त्रिक दबाब कायम राख्दै सत्य र न्यायको पक्षमा उभिएको कुरा अवगत गराउन चाहन्छौं ।”