अनलाइन डबली
काठमाडौं । हरेक संघर्षमा जस्तै जेन्जी संघर्षमा पनि दलितको प्रतिनिधित्व नभएकोप्रति जेन्जी अगुवाले रोश व्यक्त गरेका छन् ।
शुक्रबार राजधानीको संवाद डबलीमा भएको पत्रकार सम्मेलनमा उनिहरुले जेन्जी सरकारमा प्रतिनिधीत्वको मागसमेत राखेका छन् ।
जनक परियारले जेनजीहरुका माग पूरा नगरिए भन्दै आक्रोश व्यक्त गरेका छन् । परियारले हरेक आन्दोलनजस्तै जेन्जी आन्दोलनमा पनि दलितहरुले महत्वपूर्ण भूमिका खेलेकोले प्रतिनिधित्वको माग गरेका छन् । परियारले भदौ २३ र २४ गते भएको जेन्जी आन्दोलनको जगमा बनेको सरकारले तत्कालिन प्रधानमन्त्री केपी ओली, गृहमन्त्री रमेश लेखक र सिडियोलाई नपक्रिएकोमा आपत्ति जनाए ।
अर्का जेन्जी विवेक थापाले आफूहरु भ्रष्टाचार मुक्त समाज र सुशासन तथा कार्यकारी प्रधानमन्त्रीको लागि लडाई लडेको तर त्यो विषयान्तर हुनलागेकोप्रति चिन्ता व्यक्त गरे ।
२०४६ सालपछिका उच्च पदस्थ राजनीतिज्ञ तथा कर्मचारीको सम्पत्ति छानविन गर्नुपर्ने, जेन्जीहरुलाई मन्त्रीपरिषदमा प्रतिनिधीत्व गर्नुपर्नेलगायतका माग सबै ओझेल पर्ने खतरा बढेको भन्दै चिन्ता व्यक्त गरे । त्यसैगरी अर्का जेन्जी गणेश थापाले परिवर्तनका लागि गरिएको संघर्षमा जेन्जीहरुको प्रतिनिधीत्व नहुनुनै दुःखत विषय भएको बताए । थापाले दलित लगायतका सम्पूर्ण वास्तविक जेन्जीहरुलाई समेटेरे मन्त्री मण्डल तथा सरकारी निकायमा प्रतिनिधित्व गराउनु पर्ने र सो माग पुरा नभए आफूहरु पुनः संघर्षमा उत्रने चेतावनी दिए ।
दलित गैर सरकारी संस्था महासंघ (डिएनएफ) का अध्यक्ष जेवी विश्वकर्माले कथित उचनिचको जात व्यवस्थाका कारण ६० लाख दलितहरु अझै पनि अन्यायमा परिरहेको बताए । जेन्जी आन्दोलनमा पनि व्यापक दलित सहभागि भएको दाबि गर्दै विश्वकर्माले जेन्जी सरकारले दलित समुदायलाई न्यायको लागि पहल गर्न मागसमेत गरे ।
