हेटौडा । मकवानपुरको बकैया गाउँपालिका वडा नं. २ मा रहेको श्री ऋषेश्वार सामुदायीक वनमा अवैध फडानी जारी रहेको छ । स्थानीय जनप्रतिनिधि, सामुदायीव वन उपभोक्ता समिति, काठ तस्कर र भाडाका गुण्डाको मिलेमतोमा वन फडानी भइरहेको समाचार अनलाइन डबलीले यसअघि पनि प्रकाशित गरेको थियो । अहिले पनि वन फडानी रोकिएको छैन ।

अख्तियारीको दुरुपयोग गरेर स्थानीयले समितिका पदाधिकारीविरुद्ध अख्तियार दुरुपयोग अनुसन्धान आयोगमा उजुरी दिएका थिए ।

अख्तियारले काठ रोक्का गरेकै बेला समितिका पदाधिकारी, स्थानीय जनप्रतिनिधि र काठ तस्करले गुण्डाको आडमा फडानी जारी राखेको स्थानीयले बताएका छन् ।

हरियो वन उजाड हुनेगरी अवैध रुपमा रुख कटान जारी राखेपछि स्थानीय विरोधमा उत्रिएका छन् । वन फडानीमा समितिका अध्यक्ष नरबहादुर बास्कोटासहित वर्तमान र पूर्व पदाधिकारीसँगै स्थानीय जनप्रतिनिधिको संलग्नता रहेको स्थानीयले बताएका छन् ।

वन फडानीको विरोध गर्ने स्थानीयलाई समितिका अध्यक्ष नरबहादुर बासकोटा, गणेशबहादुर थिङ, कुन्साङ मोक्तान, दुर्गा बहादुर स्याङतान, आइतमान जिम्बा, मानबहादुर मोक्तान र चोर बाबु भनिने बाबु लामले ज्यान मार्ने धाम्की दिँदै आएका छन् ।

गुण्डा भनेर चिनिएका चोरबाबुलाई धम्की दिन प्रयोग गर्ने गरेको स्थानीयले बताएका छन् । वडा सदस्य गणेश थिङले चोरबाबुको नामबाट फडानीको विरोध गर्ने स्थानीयलाई ज्यान मार्ने धम्की दिँदै आएको आरोप पनि स्थानीयले लगाएका छन् । विरोध गर्ने स्थानीयलाई गाउँप्रवेश गर्न नदिने थिङले धम्की समेत दिने गरेका छन् ।

यसअघि अवैध फडानीकाे प्रमाण नष्ट गर्न वनमा आगो लगाएकाे आरोप स्थानीयले लगाएका थिए । स्थानीयले वनका कर्मचारीकाे मिलेमताे रहेकाे आरोप समेत लगाएका छन् ।

स्थानीयले उनीहरुविरुद्ध जिल्ला प्रशासन कार्यालय मकवानपुरमा शान्ति सुरक्षाको माग गर्दै निवेदन दिएका छन् ।  उक्त सामुदायीक वनमा २०६६ सालदेखि हालसम्म वनका कर्मचारीसँगको मिलेमतोमा समितिका पदाधिकारीहरुले आफ्नो स्वार्थ पूरा गर्न अवैधरुपमा वन फडानी गरिरहेका छन् ।

अख्तियारमा दिइएको उजुरीमा मानबहादुर मोक्तान (२०६६ सालको उपभोक्ता वन समिति अध्यक्ष, आइतमान जिम्बा (२०७७÷०७८ सालका अध्यक्ष), नरबहादुर बास्कोटा (हालका अध्यक्ष), दुर्गाबहादुर स्याङ्तान (सचिव), कुन्साङ मोक्तान (श्रीमति समिति सदस्य), तोकबहादुर स्याङ्तान (ठेकेदार तथा लगानीकर्ता) र जनप्रतिनिधि (वडा सदस्य) गणेश लामामाथि छानविन गरी कारवाहीको माग गरिएको थियो ।
अध्यक्ष बास्कोटाले वन डिभिजन कार्यालयबाट ल्याएको कटानी सहमतिभन्दा धेरै काठ काट्दै आएको उजुरीमा उल्लेख छ ।

१. मकवानपुरको ऋषेश्वर सामुदायीक वनका पदाधिकारीवरुद्ध अख्तियारमा उजुरी

२. ऋषेश्वर सामुदायीक वन फडानी प्रकरणः गृह मन्त्रालयको निर्देशनपछि प्रहरी पुग्यो

३. मकवानपुरको ऋषेश्वर सामुदायीक वनमा फडानी जारी, स्थानीयलाई गाउँ प्रवेशमा निषेध

४. ऋषेश्वर सामुदायीक वनमा अख्तियारले निगरानी बढाएपछि अवैध काठ ओसार्न तेस्रो मार्ग

५. प्रमाण नष्ट गर्न ऋषेश्वर सामुदायीक वनमा डढेलो ? यसो भन्छन्– अध्यक्ष बस्कोटा