अनलाइन डबली
बुटवल । उपप्रधान तथा गृहमन्त्री रवि लामिछानेमाथि छानविनको माग गर्दै सुप्रिम बचत तथा ऋण सहकारी संस्थाका पीडितहरु सडकमा निस्किएका छन् ।
बुटवलस्थित सहकारीका पीडित विगत लामो समयदेखि आफ्नो बचन हिनामिनामा संलग्नलाई कारवाहीको माग गर्दै आन्दोलनरत छन् ।
गृहमन्त्री लामिछानेले उक्त सहकारी संस्थाको दुई करोड रुपैयाँ अपचलन गरेको दाबी गर्दै पीडितहरुले छानबिनको माग गर्दै आएका छन् ।
सुप्रिम सहकारीपीडित संघर्ष समितिले आयोजना गरेको प्रदर्शनमा सहभागी पीडितले सहकारीको रकम हिनामिनामा संलग्न संस्थाका पूर्व अध्यक्ष जीबी राईलाई पक्राउ गरेर कारबाही गर्न माग गरेका हुन् ।
पीडितहरु राजमार्ग चौराहामा भेला भएर प्लेकार्ड बोकेर प्रदर्शन गर्दै नाराबाजी गर्दै पीडित बुटवलको ट्राफिक चोकमा पुगेर कोणसभा गरेका थिए । प्रदर्शनमा सहभागीले गृहमन्त्री लामिछानेले मुख्य आरोपी जीबी राईलाई पक्राउ नगर्नुका कारण समेत माग गरेका छन् ।
गृहमन्त्री लामिछानेले रकम अपचलन गरेको पुष्टि भएको खबर सार्वजनिक भएपछि पीडितले छानबिनको माग गर्दै सडकमा निस्किएका हुन् ।
जिल्ला सरकारी वकिलको कार्यालयले सोमबार जिल्ला अदालतमा पेस गरेको अभियोग पत्रमा लामिछानेले सहकारीबाट दुइ करोड रुपैयाँ अपचलन गरेको उल्लेख छ ।
