अनलाइन डबली
काठमाडौँ । राष्ट्रिय स्वतन्त्र पार्टीका सभापति रबि लामिछाने आफै सरकारमा जाने निष्कर्षमा पुगेका छन् । नयाँ समिकरण हुने निश्चित भएसँगै सोमबार विहानै बैठक बोलाएर निर्णय लिने अधिकार आफूले लिएका छन् ।
रबि जुन मन्त्रालय पाएपनि सरकारमा सहभागी हुने निश्चित भएको छ । आजै चारजना मन्त्रीले शपथ लिँदैछन् । नेकपा एमालेबाट पदम गिरी, नेकपा माओवादी केन्द्रबाट वर्षमान पुन, रबि र उपेन्द्र यादवले शपथ लिने तयारी भइरहेको छ ।
“नयाँ गठबन्धन निर्माण हुँदैगर्दा रबिजीले पटकपटक आफूलाई नछुटाउन प्रधानमन्त्री प्रचण्डसँग आग्रह गर्नुभएको थियो । त्यस्तै एमाले अध्यक्ष केपी शर्मा ओलीसँग पनि प्रचण्डलाई मनाइदिन निकै आग्रह गरेका थिए” स्रोतले भन्यो ।
रबि लामिछाने जुनसुकै मन्त्रालय पाएपनि सरकारमा जाने तयार भएका छन् । तर, अहिले उपप्रधानमन्त्री भइसकेको हुँदा उपसहित अन्य जुन मन्त्रालय स्वीकार गर्न तयार रहेको स्रोतको दाबी छ ।
“संसदको चौथो ठूलो दलले सरकारमा सहभागी हुन्छ भनेपछि लिनु परिहाल्यो, उहाँको कुरा सुन्दा त उपसहित जुन मन्त्रालय दिएपनि हुन्छ जस्तो छ तर पार्टीको हैसियतअनुसार मन्त्रालय लिने पर्ने हुन्छ” गठबन्धनका एक नेताले भने ।
ओली र प्रधानमन्त्री प्रचण्डले रबिलाई कुन मन्त्रालय दिने भन्नेबारे अहिलेसम्म मुख नखोलेको बताइएको छ । तर, रबिको पार्टीका नेताहरुले आफूले गृहमन्त्रालय पाउने दाबी गरेका छन् ।
