अनलाइन डबली
काठमाडौं । अन्तिम युद्ध भन्दै इजरायलले गाजामा हवाई र स्थल हमला गरेको थियो । उसले अपेक्षाकृत सफलता हात नलागेपछि फिर्ता हुने बहाना खोजिरहेको चर्चा सुरु भएको छ ।
हमासको सुरुङ सञ्जाल ध्वस्त नपारेसम्म फिर्ता नहुने वाचासहित हमलाको गरेको इजरायलले लामो युद्धबिरामको प्रस्ताव गरेको छ । अन्तर्राष्ट्रिय संचारमाध्यमहरुका अनुसार इजरायलले लामा युद्धविरामको लागि पहल गरेको थालेको छ ।
इजरायलले मध्यस्थको भूमिका खेलिरहेका इजिप्ट र कतारमार्फत हमासलाई दुई महिना लामो युद्धबिरामको प्रस्ताव पठाएको छ । यसको पुष्टि इजरायलको रक्षा विभागले गरेको अन्तर्राष्ट्रिय संचारमाध्यमहरुले समाचारमा उल्लेख गरेका छन् ।
प्रस्तावमा इजरायलले गाजामा रहेका सबै बन्धकहरूलाई रिहा गर्न माग गरिएको छ । गाजामा बन्धक बनाएका धेरै इजरायलीहरूको परिवारले सरकारलाई दबाब दिइरहेका छन् ।
सोमबार संसदीय समितिको बैठकका क्रममा बन्धकका आफन्त संसदमा प्रवेश गरेका थिए । उनीहरुले प्यालेस्टाइनमा बन्धक मारिएको अवस्थामा यहाँ बैठक बस्न नमिल्ने बताएका थिए ।
इजरायलको यो प्रस्तावलाई गाजाबाट पछि हट्न खोजेको अर्थमा हेरिएको छ । भनेको समयभित्र गाजालाई नियन्त्रणमा लिन र हमासलाई कमजोर बनाउन नसकेपछि इजरायलले पछि हट्ने योजना बनाइरहेको बताइएको छ ।
यस्तै आइतबार राति मानिसहरूले आफ्ना परिवारका सदस्यहरूलाई रिहा गर्न माग गर्दै इजरायली सरकारविरुद्ध प्रदर्शन गरेका थिए।
७ अक्टोबरदेखि जारी युद्धमा अहिलेसम्म २६ हजारभन्दा बढीको ज्यान गइसकेको छ । जसमा महिला र बालबालिका बढी रहेका छन् ।
