अनलाइन डबली
काठमाडौं । इजरायल र प्यालेस्टाइनबीच ५ दिनको युद्ध विराम भएको बताइएको छ । अमेरिकाको पहलमा ५ दिनको युद्धविराम भएको र त्यसको बदलमा दुवै देशले दर्जनौं बन्दीहरु रिहा गर्ने पनि भएका छन् ।
उता, इजरायली प्रधानमन्त्री बेन्जामिन नेतान्याहुले आफ्ना सैनिकलाई बन्धकहरूलाई फिर्ता गर्ने काममा प्रगती भइरहेको बताएको अन्तर्राष्ट्रिय सञ्चारमाध्यमहरुले जनाएका छन् ।
अक्टोबर ७ देखि इजरायल र प्यालेसटाइनबीच लगातार युद्ध भइरहेको छ । यो युद्धका क्रममा १० जना नेपाली पनि मारिएका छन् भने एक जना अझै बेपत्ता रहेका छन् ।
इजरायली प्रधानमन्त्री नेतान्याहुको कार्यालयले एक विज्ञप्ति जारी गर्दै नागरिकको रिहाइका लागि बैठक गर्ने र अस्थायी सम्झौतामा बन्धकहरू र प्यालेस्टिनी कैदीहरूको आदानप्रदानका साथै पाँच दिनको युद्धविराम समावेश हुने उल्लेख गरेको छ ।
प्यालेस्टाइनको हमासले सुरुमा इजरायलमाथि आक्रम गरेको थियो । बदलामा इजरायलले जवाफी कारबाही सुरु गरेपछि १२ हजार ७ सय भन्दा बढी प्यालेस्टाइनी मारिएका छन् ।
तीमध्ये दुई तिहाइ महिला र बालबालिका छन् । करिब ४०० जना बेपत्ता छन् । हमासको आक्रमणमा करिब १२०० इजरायली मारिएका छन् र करिब २५० जनालाई बन्दी बनाइएको छ ।
इजरायलले गाजा क्षेत्रमा अन्धाधुन्द बमबारी गरेका कारण सो क्षेत्र पूरै ध्वस्त भएको छ । मानवीय संकट पैदा हुँदा समेत साहयता जान दिइएको छैन ।
अहिले पनि गाजामा इन्टरनेट र विजुलीको पहुँचबाट अलग बनाइएको छ । इजरायल-हमासबीचको जमिन युद्धमा के भइरहेको छ र त्यहाँका नागरिकको अवस्था कस्तो छ भन्ने जानकारी विश्वसामु आउन सकेको छैन ।
यो युद्धविरामको उपयोग गर्दै नेपाली विपिन जोशीको रिहाईको पहल थालिएको बताइएको छ । विपिन हमासकै नियन्त्रणमा रहेको बताइएको छ ।
