अनलाइन डबली
काठमाडौँ । क्रान्तिकारी पार्टी निकट पत्रकार संगठनको नाम ‘क्रान्तिकारी प्रेस संगठन’ हुने भएको छ । शनिबार काठमाडौँमा क्रान्तिकारी पत्रकार महासंघ र क्रान्तिकारी पत्रकार संगठन, नेपालबीच एकता भेलाले नयाँ नाम र नेतृत्वको टुंगो लगाएको हो ।
एकता भेलाले कमल बुढालाई संयोजक र नारायण पंगेनीलाई सहसंयोजकमा चयन समेत गरेको छ । नेकपा (क्रान्तिकारी माओवादी) र नेकपा (बहुमत) बीचको एकतासँगै निकट पत्रकार संगठनबीच पनि एकता भेला भएको छ । भेलाले बुढाको संयोजकत्वा ६५ सदस्यीय राष्ट्रिय सम्मेलन आयोजक कमिटी निर्माण गरेको छ ।
भेलाले समसामयीक प्रस्ताव पारित गर्दै श्रमजीवी पत्रकारहरूको पेसागत सुरक्षाको साथै नेपाल पत्रकार महासंघले शुद्धीकरणका नाममा पार्टीमा आस्था राखेकै आधारमा पत्रकारलाई सदस्यताबाट बञ्चित गर्ने कार्यविरुद्ध संघर्ष गर्ने निर्णय समेत गरेको छ ।
नवनिर्वाचित कमिटीको बैठक चाँडै बस्ने समेत बताइएको छ ।
भेलालाई क्रान्तिकारी कम्युनिस्ट पार्टीका प्रवक्ता धर्मेन्द्र बास्तोला, पार्टीको कार्यालय सदस्य दिनेश शर्मा सागरलेगायतले शुभकामना मन्तव्य दिएका थिए ।
