काठमाडौँ । करिब एक क्वीन्टल सुन प्रकरणको छानविन गर्न गठित समितिले काम थालेको छ । त्रिभुवन विमानस्थलबाट बाहिरिएको करिब १ सय किलो सुनबारे छानबिन गर्न भन्सार विभागले छानविन समिति गठन गरेको हो ।

भन्सार विभागका अनुसन्धान शाखाका निर्देशक मानबहादुर पौडेलको संयोजकत्वमा ७ सदस्यीय समिति गठन गरिएको छ । भन्सार विभागका कर्मचारीको संलग्नताबारे छानबिन गर्ने समितिलाई जिम्मेवारी दिइएको छ ।

विभागका अनुसार भन्सारबाट सुन पास भएको विषय संगठित रुपमा भएको हो वा प्राविधिक कमजोरीमा तस्करले फाइदा उठाएको हो भन्नेबारे अनुसन्धान अघि बढाएको बताइएको छ ।

यसैबीच सुन प्रकरणको जाँच पासमा संलग्न सबैलाई निलम्बनको तयारी गरिएको भएको विभागले जनाएको छ ।

यो प्रकरणमा एक भारतीय नागरिकसहित ६ जना पक्राउ परेका छन् ।