धनन्जय बुढा
सुर्खेत । नेकपा(माओवादी केन्द्र) हुम्ला जिल्ला समन्वय समिति सल्लाहकार ५६ वर्षिय गजबहादुर रावत(दिलीप)को गयराती सुर्खेत स्थित प्रदेश अस्पतालमा उपचारको क्रममा निधन भएको छ । बिहिबार विहान ६ बजे जेब्रा क्रसिङ गर्नेक्रममा अटोले टक्कर दिएर गम्भिर घाइते भएका रावतको १ बजे राती निधन भएको जिल्ला पार्टी संयोजक डा.दिपेन्द्र रोकायाले अनलाईन डबलीलाई बताए ।
२०५४ सालदेखि तत्कालिन नेकपा(माओवादी)ले सञ्चालन गरेको जनयुद्धमा होमिएका रावत निरन्तर पार्टीका विभिन्न जिम्मेवारी सम्हाल्दै आएका थिए । सर्केगाड गाउँपालिका वडा न ३ का निवर्तमान अध्यक्षसमेत रहेका रावतको निधनले पार्टीका एकजाना परिपक्व र इमान्दार नेता गुमाएको र त्यसले पार्टीलाई अपुरणिय क्षति भएको डा. रोकायाले बताए । यस दुःखत घडिमा शोकाकुल परिवार तथा आफन्तजनहरुमा गहिरो समवेदना व्यक्त गर्दै सिंगो पार्टी कमिटीलाई धैर्यधारण गर्न अनुरोध गर्दछु, डा.रोकायाले थपे ।
हालै मात्र नेकपा(माओवादी केन्द्र) हुम्लाको ताँजाकोट गाउँकमिटि अध्यक्ष अकवीर खड्काको पनि कर्णाली प्रदेशको राजधानी वीरेन्द्रनगरमै सवारी दुर्घटनामा परी निधन भएको थियो । संयोजक रोकायाले अकवीरको पीडा कम हुननपाउँदै पुनः सवारी दुर्घटनामा आफ्ना अर्का होनाहार नेताको मृत्युले आफूहरुलाई थप मर्माहित बनाएको र यी दुबै घटना शंकास्पद भएको जिकिरसमेत गरेका छन् । डा.रोकायाले दुवै घटनाको छानबिन र उचित क्षतिपूर्तिको लागि पार्टीले मागगरेकोसमेत बताएका छन् । मृतक रावतको परिवार नआएसम्म लासलाई बाहिर ल्याउन तथा पोष्टमार्टम गर्न नदिने अनलाईन डबलीसँग कुरा गर्दै बताए । ‘हामी यी दुर्घटनाहरुको निश्पक्ष छानविन र उचित क्षतिपूर्तिको माग पूरा नभएसम्म अत्यष्ठी हुनदिने छैनौं’, रोकायाले थपे ।
गजबहादुर रावत
जन्मः २०२४/६/८
मृत्यूः २०८०/३/२९
स्थानः उनापानी
राजीतिक पृष्ठभूमीः
– २०५४ वैशाख १० गते तत्कालिन नेकपा (मओवादी) को पार्टी सदस्य
– २०५४ भदौमा तत्कालिन सर्किदेउ गाविसको उप–प्रमुखको जिम्मेवारी
– २०५५ सालमा पार्टी एरिया कमिटी सदस्य
– २०५५ असोजमा पार्टी पूर्णकालिन सदस्य भएर भूमिगत, बराई गाउँकमिटी इन्चार्ज
– २०५६ सालमा जिल्ला कमिटी सदस्य
– २०७४ बैशाखमा वडाअध्यक्ष निर्वाचित ।
– हाल हुम्ला जिल्ला नेकापा(माओवादी केन्द्र) जिल्ला समन्वय समिति सल्लाहकार
