अनलाइन डबली
काठमाडौं । आईसीसी एक दिवसीय विश्वकप छनोटको प्लेअफमा आज नेपालले संयुक्त अरब इमिरेट्स (यूएई)सँग खेल्दैछ । नेपाली समयअनुसार खेल दिउँसो पौने १ बजे जिम्बावेको हरारेमा शुरु हुनेछ ।
विश्वकप खेल्ने सपना पूरा बोकर जिम्बावे गएको नेपाली टोली सुपर सिक्समा पुग्न सकेन । नेपाल समूह ए को चौथो स्थानमा रहेको थियो भने यूएईले समूह बी मा खाता पनि खोल्न सकेको थिएन ।
आजको खेलमा नेपालले युएईलाई पराजित गर्न सके सातौं स्थान बनाउनेछ ।
नेपाल र युएईबीच अहिलेसम्म १४ वटा एकदिवसीय खेल भएकोमा नेपाल ८ खेलमा र यूएई ६ खेलमा विजयी भएका छन् । विगतमा भएका खेलका आधारमा नेपालले युएईलाई पराजित गर्ने अपेक्षा गरिएको छ ।
आजै विश्वकप छनोटको सुपर सिक्समा श्रीलंका र जिम्बावेले खेल्दैछन् । खेल दिउँसो पौने १ बजे हुनेछन् ।
हिजो स्कटल्याण्डसँग पराजित भएर वेष्ट इन्डिज बाहिरिएसँगै शीर्ष स्थानको श्रीलंका र दोस्रो स्थानको जिम्बावेले विश्वकप खेल्ने सम्भावना उच्च छ । तेस्रो स्थानको स्कटल्याण्ड्को पनि गणितीय सम्भावना कायमै छ ।
दुई पटकको विश्व विजेता वेस्ट इन्डिज पहिलो पहिलोपटक विश्वकपमा छनोटबाट बाहिरएको छ । वेष्ट इन्डिजले दुई पटकको एकदिवसीय र टी–२० विश्व जितेको थियो ।
