काठमाडौँ। पोखराको फेवातालमा आज बात ‘नेपाल–चाइना ड्रागन बोट रेस फेस्टिबल’ सुरु हुँदैछ । चिनियाँ राजदूतावास, पोखरा महानगरपालिका र नेपाल पर्यटन बोर्डको संयुक्त आयोजनामा हुन लागेकाे यो रोमाञ्चक प्रतियोगितामा चिनियाँ चार र नेपाली चार गरी आठ टाेलीकाे सहभागिता हुने भएको छ ।

प्रतियाेगितामा सहभागी टोलीले पाँच सय र दुई सय मिटरको दुरीमा डुङ्गा दौड गर्नेछन । बंग्लादी घाटदेखि स्विमिङपुलघाटसम्म हुने डुङ्गा दौड प्रतियोगितामा पाँच सय मिटरतर्फ विजेताले पाँच लाख, उपविजेताले तीन लाख र तेस्राे हुनेले दुई लाख रुपैयाँ पुरस्कार रकम तोकिएको छ । त्यसैगरी दुई सय मिटरतर्फ विजेताले तीन लाख, उपविजेताले दुई लाख र तेस्राे हुनेले एक लाख रुपैयाँ पुरस्कार प्राप्त गर्नेछन् ।

यसै गरि दुई दिन सम्म संचालन हुने यस प्रतियाेगितामा नेपाली र चिनियाँ खाना, चिनियाँ सांस्कृतिक कार्यक्रम आकर्षण रहनेछ । ‘नेपाल–चाइना ड्रागन बोट रेस फेस्टिबल’ मा सहभागी हुन ६० जना खेलाडीसहितको झन्डै दुई सय चिनियाँ टोली विमान चार्टर्ड गरेर पोखरा आइसकेको आयोजन टोलीले जनाएको छ । पोखरा पर्यटन परिषद् र चाइनिज ओभरसिज एसाेसियशन पोखरा सहयोगी संस्थाका रूपमा रहने यो फेस्टिबलका लागि दुई करोड ५० लाख रुपैयाँ खर्च लाग्ने अनुमान आयोजकको छ ।