अनलाइन डबली
काठमाडौं । शहीद स्मारक ‘ए’ डिभिजन लिग फुटबल अन्तरगत मंगलबार भएको खेलमा नेपाल पुलिस क्लब र फ्रेन्ड्स क्लब विजयी भएका छन् । पुलिसले मनाङ मर्स्याङ्दी क्लवलाई १-० गोलले हराएको थियो ।
यो खेल एन्फा कम्प्लेक्सको मैदान सातदोबाटोमा भएको थियो । यो मनाङको लगातार पाँचौं हार हो । खेलमा मनाङले १२ खेलमा १५ अङ्क जोडेको छ भने पुलिसको नाै अङ्क रहेको छ ।
त्यसैगरी दशरथ रङ्गशालामा भएको खेलमा फ्रेन्ड्स क्लबले न्युरोड टिम (एनआरटी) लाई तीन–एक गोलले हराएको थियो । फ्रेन्ड्सको जितमा राफिक अमिनु, टोरिक जेब्रिन र प्रकाश बुढाथोकीले गोल गरे । एनआरटीका सन्जिब विष्टले एक गोल फर्काए । फ्रेन्ड्सको १२ खेलमा १४ र एनआरटीको १३ अङ्क छ ।
