अनलाइन डबली
काठमाडौं । चलचित्र कलाकार संघको अध्यक्षमा मोहन निरौला झिनो मतले विजयी भएका छन् । १९ औं महाधिवेशनले नयाँ कार्यसमिति निर्वाचित गराएको थियो ।
निरौलाले अध्यक्ष पदकी निकटतम प्रत्यासी रेजिना उप्रेतीलाई २६ मतले पराजित गरेका छन् । निरौलाले २३५ मत प्राप्त गरेका थिए भने रेजिना उप्रेतीले २०९ मत प्राप्त गरिन् । कूल खसेको मत ४६८ थियो । २६ मत बदर भएको निर्वाचन समितिले जनाएको छ ।
निरौला स्थापनाकालमा महासचिव र अघिल्लो कार्यकालमा उपाध्यक्ष पदमा रहेर काम गर्दै आएका थिए ।
नयाँ कार्यसमितिको उपाध्यक्षमा कविता गेलाल र शिवहरि बैरागी र महासचिवमा सबिन श्रेष्ठ निर्वाचित भएका छन् । सचिवमा रामेश्वर बुर्लाकोटी, कोषाध्यक्षमा सुनिल कटुवाल विजयी भए । सह–कोषाध्यक्षमा पवित्रा आचार्य निर्विरोध निर्वाचित भएकी थिइन् ।
