अनलाइन डबली
काठमाडौं । स्वतन्त्र विद्यार्थी युनियन (स्ववियु) निर्वाचनको मौन अवधि सुरु भएको छ । गएराति १२ बजेदेखि मौन अवधि सुरू भएको हो ।
स्ववियु निर्वाचन आचारसंहिताअनुसार मौन अवधिमा स्ववियु निर्वाचन आचारसंहितामा प्रचार-प्रसार गर्न रङरोगन र कुनै पनि प्रकारको पोष्टर टाँस्न, निर्वाचनसम्बन्धी कुनै पनि तुल, फ्लेक्स र कुनै प्रकारको पोष्टर टाँस्न पाइने छैन ।
आचारसंहिता अनुसार निर्वाचन हुनुभन्दा ४८ घण्टा अगाडि प्रचार-प्रसार बन्द गर्न मौन अवधि घोषणा गरिएको हो ।
देशभरिका त्रिविका ६२ आङ्गिक र एक हजार ४० सम्बन्धन प्राप्त क्याम्पसमा आइतबार स्ववियु निर्वाचन हुँदैछ ।
काठमाडौं उपत्यकाका त्रिचन्द्रलगायत केही क्याम्पसहरुमा विद्यार्थीहरुबीच झडपका कारण चुनाव स्थगित सारिएको छ ।
अध्यक्ष, सचिव र कोषाध्यक्ष तथा ५० प्रतिशत सदस्य प्रत्यक्ष निर्वाचन प्रणाली र उपाध्यक्ष, सहसचिव र ५० प्रतिशत सदस्य समानुपातिक निर्वाचन प्रणालीबाट निर्वाचित हुनेछन् ।
स्ववियू निर्वाचन सम्बन्धी कार्यविधिमा दुई सय विद्यार्थी बराबर ११ सदस्यीय कार्यसमिति, दुई सय एकदेखि एक हजारसम्म विद्यार्थी भए १३ जनाको कार्यसमिति, एक हजार एकदेखि तीन हजारसम्म भए १९ जनाको र तीन हजार एकदेखि पाँच हजारसम्म २१ सदस्यीय कार्य समिति चयन गर्नुपर्ने छ ।
