अनलाइन डबली
काठमाडौं । कालाकार पल शाह आज रिहा हुँदैछन् । उच्च अदालत पोखराबाट जबर्जस्ती करणी अभियोगमा सफाइ पाएका अभिनेता पूर्णविक्रम शाह (पल शाह) आज रिहा हुने भएका हुन् ।
आइतबार जिल्ला अदालत नवलपुरको फैसलाविरुद्ध शाहले दिएको रिटमाथि सुनुवाइ गर्दै उच्च अदालत पोखराले शाहलाई पूर्ण सफाइ दिएको हो । शाह जिल्ला प्रहरी कार्यालय तनहुँको हिरासतमा छन् ।
आइतबार कार्यालय समय सकिइसकेकाले आवश्यक प्रक्रिया पुर्याउन ढिला भएकोले शाह आज रिहा हुन लागेको उनका वकिलले बताएका छन् ।
शाह सोमबार रिहा भएपछि काठमाडौं आउने बुझिएको छ । एक गायिकाले शाहले सुटिङका क्रममा बलात्कार गरेको भन्दै २०७८ फागुन ११ गते तनहुँमा र फागुन १५ गते नवलपुर प्रहरीमा उजुरी दिएकी थिइन्।
तनहुँ र नवलपुर जिल्ला अदालतले बकपत्र गर्दा पीडित १७ वर्षीया नाबालिगले आफूमाथि बलात्कार नभएको भन्दै बयान फेरेकी थिइन्। बलात्कार आरोपमा परेको मुद्दामा शाहलाई जिल्ला अदालत तनहुँले यसअघि नै सफाइ दिइसकेको थियो ।
यसैबीच समिक्षा अधिकारीले एक स्टाटस लेख्दै विगतका तिता अनुभव भुलेर सहकार्य हुने विश्वास व्यक्त गरेकी छन् । अदालतको फैसलालगत्तै अधिकारीले सामाजिक संजाल फेसबुकमा प्यारो दाई भन्दै स्टाटसले लेखेकी छन् ।
