अनलाइन डबली
काठमाडौं । नेपाल क्रिकेट संघ (क्यान) ले राष्ट्रिय क्रिकेट टोलीका पूर्व कप्तान सन्दीप लामिछानेमाथिको निलम्बन फुकुवा गरेको छ । उच्च अदालत पाटनले धरौटीमा रिहा गर्न दिएको आदेशविरुद्ध सर्वोच्च अदालतमा निवेदन परेको दिन क्यानले फुकुवा गरेको हो ।
महान्यायाधिक्ताको कार्यालयले मंगलबार उच्च अदालतको आदेश बदर गर्न माग गर्दै सर्वोच्चमा निवदेन दिएको हो ।
मंगलबार पोखरामा बसेको क्यान बोर्ड बैठकले सन्दीपको निलम्बन फुकुवा गर्ने निर्णय गरेको थियो । निलम्बन फुकुवाको एजेन्डा बैठकबाट पास भएको बताइएको छ । तर निलम्बन फुकुवाबारे क्यानले औपचारिक रुपमा धारणा सार्वजनिक गरेको छैन ।
निलम्बन फुकुवा गरेपनि सन्दीपलाई राष्ट्रिय टोलीमा समावेश गर्ने वा नगर्नेबारे क्यानले निर्णय गरिसकेको छैन । सन्दीपलाई फुकुवा गर्ने निर्णयप्रति ७ जना सदस्यले कार्यसम्पादन समितिको विषयमा असन्तुष्टि समेत व्यक्त गरेका छन् ।
गएको भदौ ५ गते काठमाडौंको एक होटलमा लगेर नाबालिगलाई ब लात्कार गरेको आरोप लागेको थियो । पक्राउ पुर्जी जारी भएसँगै क्यानले सन्दीपलाई गएको भदौ २३ मा निलम्बन गरेको थियो ।
उच्च अदालत पाटनले काठमाण्डौ जिल्ला अदालतको आदेश बदर गरी पुस २९ मा २० लाख रुपैयाँ धरौटीमा रिहा गर्न आदेश दिएको थियो ।
