अनलाइन डबली
काठमाडौं । पाकिस्तानीको पेशावरको एक मस्जिदमा भएको हमलामा परी मृत्यु हुनेको संख्या ६० पुगेको अन्तर्राष्ट्रिय संचारमाध्यमहरुले जनाएका छन् । स्थानीय समयअनुसार सोमबार दिउँसो १ः३० बजेतिर हमला बम बि स्फोट गराइएको थियो । ज्यान गुमाउनेहरुमा सुरक्षाकर्मी धेरै रहेको बताइएको छ ।
एक सरकारी उच्च अधिकारीलाई लक्षित गरी हमला गरिएको बताइएपनि उनको अवस्थाबारे खुलाइएको छैन । उक्त घटनामा १५० भन्दा धेरै घाइते भएका छन् ।
मस्जिदमा मानिसहरू भरिभराउ रहेका बेला हमलाकारीले आत्मघाती बि स्फोट गराएको स्थानीय अधिकारीहरुले जनाएका छन् । हमलाकारी मस्जिदको पहिलो लहरमा उभिएका थिए ।
गत नोभेम्बरमा युद्धविराम भङ्ग गरेको पाकिस्तानी तालिबानले हमला आफूले गराएको जनाएको छ। घटनाको थप अनुसन्धान भइरहेको छ । मस्जिदको एउटा भाग ध्वस्त भएको छ र अधिकारीहरूले मानिसहरू भग्नावशेषमा पुरिएको बताएका छन्।
मस्जिदमा विस्फोट हुँदा ३०० देखि ४०० को बीचमा प्रहरीहरू उपस्थित रहेको पेशावरका प्रहरी प्रमुखले स्थानीय सञ्चारमाध्यमहरूलाई जानकारी दिएका छन् ।
यसैबीच प्रधानमन्त्री शहबाज शरिफले कडा शब्दमा त्यस हमलाको निन्दा गरेका छन्। एक विज्ञप्तिमार्फत उनले घटना गराउनेहरूको “इस्लामसँगको कुनै साइनो नहुने” बताएका छन्। उनले पूरा देश आतङ्कवादको त्रासविरुद्ध उभिएको समेत बताए ।
अफगानिस्तानसँग सीमा जोडिएको पाकिस्तानको उत्तर पश्चिमी सहरमा रहेको सो मस्जिदमा दिउँसोको प्रार्थनाको चलिरहेको बेला हमला भएको स्थानीय संचारमााध्यमहरुलाई उदृत गर्दै बीबीसीले जनाएको छ ।
अस्पतालमा उपचार गराइरहेका घाइतेमध्ये धेरैको अवस्था चिन्ताजनक रहेको बताइएको छ ।
राजधानी ईश्लामावाद लगायतका सहरमा सुरक्षा सतर्कता बढाइएको पाकिस्तानी संचारमाध्यमहरुले बताएका छन् ।
