अनलाइन डबली
काठमाडौं । धनकुटा महोत्सवमा भीड च्यापिएर कम्तिमा पनि तीन दर्जन घाइते भएका छन् । १ नम्बर प्रदेश प्रहरी कार्यालय विराटनगरका अनुसार महोत्सवमा अत्याधिक भीडका कारण ठेलमठेल हुँदा भीडले च्यापेको हो ।
भीडमा च्यापिएका मध्ये दुई जनाको अवस्था गम्भीर रहेको प्रहरीले बताएको छ । घाइतेको वीपी कोइराला स्वास्थ्य विज्ञान प्रतिष्ठान धरानमा उपचार भइरहेको छ ।
गायक प्रमोद खरेल महोत्सवमा आउने खबरसँगै भीड बढेको बताइएको छ । टुँडिखेलमा छिर्नका लागि ठेलमठेल भएपछि ढोकामा च्यापिएर मानिसहरु घाइते भएका हुन् । घाइते हुनेमा महिला र बालबालिका पनि रहेका छन् । गम्भीर घाइते बाहेकको धनकुटा अस्पतालमै उपचार भइरहेको छ ।
मेला गत माघ ६ गते उद्घाटन भएको थियो । उक्त मेला १६ गतेसम्म सञ्चालन गर्ने तयारी थियो । धेरै सङ्ख्यामा मानिसहरू घाइते भएसँगै महोत्सव स्थगित गरिएको छ ।
