मङ्सिर १२, काठमाण्डौ । आत्मदाह गरेका इलामका प्रेमप्रसाद आचार्यले मृत्युअघि सामाजिक संजाल फेसबुकमार्फत उठाएका विषयबारे गर्न गृहमन्त्रालयले छानबिन समिति गठन गरेको छ ।
गृह मन्त्रालयका सहसचिव नारायणप्रसाद रिसालको संयोजकत्वमा ६ सदस्यीय छानबिन समिति गठन गरिएको गृहमन्त्री रवि लामिछानेको सचिवालयले जनाएको छ ।
समितिमा अर्थमन्त्रालयका उपसचिव, उद्योग वाणिज्य तथा आपूर्ति मन्त्रालयका उपसचिव, श्रम रोजगार तथा सामजिक सुरक्षा मन्त्रालयका उपसचिव, नेपाल प्रहरीका प्रहरी उपरीक्षक र राष्ट्रिय अनुसन्धान विभागका उप–अनुसन्धान निर्देशक सदस्य रहने भएका छन् ।
आचार्यले सामाजिक सञ्जालमा उठाएका सबै विषयमा यथाशीघ्र छानबिन गरी प्रतिवेदन तयार पार्न समितिलाई कार्यादेश दिइएको गृह मन्त्रालयले जनाएको छ ।
यस बिषयमा समिति बनाएर छानविन गर्न बुधबारको मन्त्रिपरिषद् बैठकले गृह मन्त्रालयलाई जिम्मा दिएको थियो ।
मंगलवार बानेश्वरमा आफैँलाई आगो लगाएका आचार्यको उपचारको क्रममा हिजो बिहान ज्यान गएको थियो ।
आचार्यले उठाएका विषयको सम्बोधन हुनुपर्ने र आचार्यले न्याय पाउनु पर्ने जनदाबाव बढ्दै गएको छ ।