काठमाडौँ । पेट्रोलियम पदार्थको मूल्य घटेसँगै आन्तरिक तर्फको हवाई भाडा घटाइएकाे छ । एयरलाइन्स कम्पनीहरूको संस्था वायु सेवा सञ्चालक संघले सोमबारबाट लागु हुने गरी नयाँ मूल्य समायोजना भएको छ ।

प्रधानमन्त्री प्रचण्डको निर्देशनमा नेपाल आयल निगमले आन्तरिक तर्फको हवाई इन्धनको मूल्य २० रुपैयाँ घटाएको थियो ।

यससँगै, यसअघि प्रतिलिटर १९० रुपैयाँ रहेको हवाई इन्धनको मूल्य १७० रुपैयाँ कायम भएको छ । हवाई इन्धनको मूल्य घटेसँगै नियमित र चार्टडतर्फको हवाई मूल्य घटेको संघले जनाएको छ ।

संघका अनुसार काठमाडौँ–धनगढीको हवाई भाडा ८८५ रुपैयाँले घटेको छ । यस्तै, काठमाडौँ–नेपालगन्जको भाडा ६५५ रुपैयाँ घटेको छ भने काठमाडौँ–भद्रपुरको भाडा ६०० रुपैयाँले घटेको छ । यसैगरी, काठमाडौँ–सुर्खेतको भाडा ६९० रुपैयाँले घटेको छ ।