काठमाडौँ । प्रभु बैंक लिमिटेडले रेड पान्डालाई एक बर्षसम्म आहारा उपलब्ध गराउने भएको छ । बैंक र राष्ट्रिय प्रकृति संरक्षण कोषबीच सदर चिडियाखानामा रहेका रेड पान्डालाई एक बर्षसम्म आहारा उपलब्ध गराउने सम्झौता भएको छ ।

प्रभु बैंक लिमिटेडको बबरमहलस्थित प्रधान कार्यालयमा सोमबार आयोजित एक समारोहमा बैंकका तर्फबाट नायब प्रमुख कार्यकारी अधिकृत मनिराम पोखरेल र कोषका तर्फबाट सदर चिडियाखानाकी प्रमुख रचना शाहले सम्झौतामा हस्ताक्षर गरेका छन् ।

प्रभु बैंकले संस्थागत सामाजिक उत्तरदायित्व अन्तर्गत कोषद्वारा सञ्चालित सदर चिडियाखानामा रहेका दुईवटा रेड पान्डाका लागि प्रभु बैंक लिमिटेडले एक वर्षसम्म आहारा उपलब्ध गराउने सम्झौता व्यवस्था गरिएको छ ।

सदर चिडियाखानाद्वारा सञ्चालित Adopt An Animal अभियान अन्तर्गत गरिएको यस सम्झौताबाट रातो हाब्रे जस्तो लोपोन्मुख वन्यजन्तुको संरक्षणको क्षेत्रमा विशेष योगदान पुग्नेछ भन्ने बैंकले विश्वास लिएको छ ।

साथै, मुलुकले लिएको दिगो विकास लक्ष्यहरु २०३० को प्राप्तिको निमित्त पनि बैंकको उक्त कार्यबाट टेवा पुग्नेछ भन्ने विश्वास लिएको छ ।