काठमाडौं । प्रधानमन्त्री प्रचण्डको निर्देशनमा आफू खुशी बढाइएको दूधको मूल्य स्थगन भएको छ । केही डेरी उद्योगहरुले आफू खुशी एकै पटक १४ रुपैयाँसम्म दूधको मूल्य बढाएका थिए ।

कृषि मन्त्रालयको समेत जिम्मेवारी समालेका प्रधानमन्त्री प्रचण्डको निर्देशनपछि राष्ट्रिय दुग्ध विकास बोर्डले दूधको मूल्य वृद्धि स्थगित भएको जनाएको छ ।

बोर्डका कार्यकारी निर्देशक डा. राजेन्द्र प्रसाद यादवले एक विज्ञप्ति जारी गरेर दूधको बढेको मूल्य फिर्ता लिएको जानकारी गराएका छन् । उनले उत्पादन लागत मूल्य, बजार मूल्यको वृद्धि तथा उपभोक्ताको क्रयशक्तिसमेतको वैज्ञानिक तवरबाट यथाशीघ्र अध्ययन गरी मूल्य समायोजन गरिने यादवले जनाएका छन् ।

राष्ट्रिय उपभोक्ता मञ्चका अध्यक्ष प्रेमलाल महर्जनले मूल्यवृद्धि विरुद्ध उजुरी गरेका थिए । त्यसमा प्रधानमन्त्री प्रचण्डले दूधको मूल्य तत्काल स्थगन गर्न निर्देशन दिएका थिए ।