अनलाइन डबली
काठमाडौं । आजबाट अंग्रेजी नयाँ वर्ष २०२३ सुरु भएको छ । नेपालसहित विश्वभर राजनीतिक र प्राकृतिक ठूलाठूला घटनासहित सन् २०२२ सकिएको छ ।
अंग्रेजी वर्षमा नेपालमा पनि मनाइँन थालिएको छ । विदेशी पर्यटकको बाक्लो उपस्थिति हुने काठमाडौंका ठमेल, बौद्ध, पोखरा, सौराहा, लुम्बिनीलगायत ठाउँमा शनिबार साँझ ‘न्यू इयर इभ’ का कार्यक्रम गरिएका छन् । आज पनि पर्यटकको चहलपहल हुने क्षेत्रमा विशेष कार्यक्रम आयोजना गरिएका छन् ।
जिजस क्राइस्टलाई फाँसी दिएपछि इस्वी सनकाे सुरुआत भएको भन्ने भनाइ पनि रहेको छ । पोप ग्रेगोरीले जुलियन पात्रो अनुसारको सनलाई प्रतिस्थापन गर्दै अहिले प्रचलनमा आएको पात्रोलाई चलाएकाले यसलाई ग्रेगोरियन पात्रो अनुसारको नयाँ वर्ष भनिन्छ ।
जुलियन पात्रो शासक जुलियस सिजरले प्रचलनमा ल्याएका थिए । विवादकै कारण यो पात्रो रुसले २०० वर्षपछि मात्र प्रचलनमा ल्याएको मानिन्छ ।
विवाद भए पनि उपनिवेशकालमा विभिन्न ठाउँमा यो सम्वत् लादेकाले अहिले यसको विश्वव्यापी प्रचार छ । इस्वी सम्वत् नेपालमा प्रचलनमा नभए पनि भ्रमणमा आउने विदेशीले यसको प्रयोग गर्छन् । केही वर्ष अघिदेखि नेपालका विभिन्न ठाउँमा अङ्ग्रेजी नयाँ वर्ष मनाउने गरिएको छ ।
