अनलाइन डबली
काठमाडौं । भारतको राजधानी दिल्लीबासीले भारतीय जनता पार्टीको एजेण्डालाई अस्वीकार गरेका छन् । दिल्लीको नागरिक निकायको निर्वाचनमा आम आदमी पार्टी (आप) ले बहुमत ल्याएको छ । नगर निगमको २ सय ५० वार्डमध्ये आपले १३४ वार्ड जितेको छ भने बीजेपी जम्मा १०४ वार्डमा सीमित भएको छ । त्यससँगै कांग्रेसले जम्मा ९ मा खुम्चिएको छ ।
भारतीय संचारमाध्यमहरुका अनुसार दिल्ली प्रादेशिक सरकार चलाइरहेको आपले बीजेपीमाथि हावी हुनु भनेको प्रधानमन्त्री नरेन्द्र मोदीको धार्मिक एजेण्डालाई दिल्लीबासीले अस्वीकार गरेका हुन् । बीजेपीले १०४ वार्ड जोगाउनुलाई सफलता मानेको छ ।
दिल्ली नगर निगम (एमसीडी) मा लगातार १५ वर्ष शासन गरेको बीजेपी यसपटकको नागरिक निकायको चुनावमा आपसँग पराजित भएको छ । बीजेपीका धेरै नेताहरूले नगर निगममा आपको बिजयले केन्द्र शासित प्रदेशमा पार्टीको भविष्य नरहेको बताउन थालेका छन् ।
बीजेपीका कतिपय नेताहरूले पार्टीकै स्थानीय नेताहरूको कमजोरीका कारण पार्टीले हार बेहोरेको भन्दै कतिपयले कर्तव्य पूरा नगरेको र मतदातालाई मतदान केन्द्रसम्म पुर्याउन घर-घरमा गएर पर्चा बाँड्न नसकेको पनि आरोप लगाएका छन् ।
न्यूज १८ सँग कुरा गर्दै बीजेपीका केही वरिष्ठ नेताहरूले खराब टिकट वितरण आफ्नो हारको कारण रहेको बताएका छन् । कतिपय वरिष्ठ नेताले पनि सांसदसँग उचित परामर्श नगरी टिकट बाँडफाँड गरेका कारणले बीजेपी हारेको उनीहरूको तर्क छ । भाजपाका केही वरिष्ठ नेताहरूले राष्ट्रिय राजधानीका धेरै वार्डहरूमा मतदाताहरूको नाम र उनीहरूले मतदान गर्ने बुथहरू सहित स्लिपहरू वितरण गर्ने काम प्रभावकारी रूपमा पार्टीले गर्न नसकेको आरोप लगाए ।
धेरै पार्टी नेताहरूले दिल्ली एमसीडी चुनावको लागि बीजेपीमा नेतृत्वको अभाव भएको विश्वास गरेका छन् । हरेक तहमा धेरै शक्ति केन्द्र र समूहहरू सक्रिय भएकाले कार्यकर्ताबाट वफादारी गराउन सक्ने कुनै पनि एकताबद्ध निकाय नभएको उनीहरूको आरोप छ ।
