अनलाइन डबली
काठमाडौँ । टर्कीको सबैभन्दा ठूलो सहर इस्तानबुलबाट २१० किलोमिटर (१३० माइल) पूर्वमा रहेको डुज्से सहर नजिकैको पश्चिमी टर्कीको क्षेत्रमा ६.० म्याग्निच्युडको भूकम्प गएको छ ।
भूकम्पको धक्का इस्तानबुल र राजधानी अंकारामा महसुस गरिएको थियो । भूकम्पमा कम्तीमा ३५ जना घाइते भएका अधिकारीहरूले बताएका छन् ।
भूकम्पको गहिराइ २ देखि १० किलोमिटर रहेको अनुमान गरिएको छ । पहिलो भूकम्प गएको २० मिनेटपछि दोस्रो भूकम्प गएको थियो ।भूकम्पले घर भत्किएपछि कतिपय मानिसहरू झ्यालबाट हाम फालेर सडकमा पुगेका थिए ।
टर्कीको प्रकोप एजेन्सीले ३२ जना डुज्सेमा, एक जना इस्तानबुलमा, एक जना ब्ल्याक सीको तटमा रहेको जोङ्गुलडाकमा र एक जना दक्षिणपूर्वमा बोलुमा घाइते भएको जनाएको छ ।
यसैबीच ब्राजिलमा आम निर्वाचन सम्पन्न भएको केही सातापछि फेरि एकपटक राजनीतिक अनिश्चितताको अवधि सुरु हुँदै गरेको देखिएको छ ।
ब्राजिलका वर्तमान राष्ट्रपति जायर बोल्सोनारोले हालैको चुनावी नतिजालाई चुनौती दिएका छन् । उनले तीन लाख भोटिङ मेसिनमा हालिएका मतलाई अवैध ठहर गर्नुपर्ने बताएका छन् ।
तर, उनले निर्वाचनमा धाँधली भएको कुनै प्रमाण भने पेश गरेका छैनन् । यस चुनावमा उनका प्रतिद्वन्द्वी तथा ब्राजिलका पूर्व राष्ट्रपति लुला दा सिल्भा विजयी भएका छन् ।
लुला दा सिल्भाले ५०.९ प्रतिशत मत प्राप्त गरे । लुलाको यो जित स्तब्ध थियो किनभने अन्तिम क्षणसम्म यी दुईबीच घनिष्ट टक्कर थियो । यस चुनावमा बोल्सोनारोले ४९.१ प्रतिशत मत पाएका छन् ।
चुनावी नतिजा आएपछि, ब्राजिलका विभिन्न प्रान्त र प्रमुख सडक मार्गमा बोलसोनारो समर्थकको तर्फबाट चक्का जामका साथै हिंसा र आगजनीको खबर र तस्बिर सार्वजनिक भएका थिए ।
