अनलाइन डबली
काठमाडौँ । काठमाडौँका विभिन्न स्थानमा ३ जना मृत अवस्थामा फेला परेका छन् । काठमाडौंको न्युरोडमा एक पुरुषको शव फेला परेको छ ।
जुद्ध शालिक नजिकको एक मन्दिरभित्र आज बिहान शव फेला परेको जिल्ला प्रहरी परिसर काठमाडौंका एसपी दिनेशराज मैनालीले जानकारी दिए ।
शव अन्दाजी ५५/५६ वर्षको पुरुषको हो । प्रहरीका अनुसार उनी ज्याला मजदुरीको काम गर्दै आएका व्यक्ति हुन् । तर सनाखत हुन बाँकी रहेको छ ।
उनको टाउकोमा चोट देखिएको छ । घटनास्थलमा ढोकामा लगाउने आग्लो जस्तो लामो काठ पनि फेला परेको छ । घटनाको प्रकृति हेर्दा उनको ह त्या भएको हुन सक्ने प्रारम्भिक अनुमान प्रहरीले गरेको छ ।
उपत्यका अपराध अनुसन्धान कार्यालयको टोली घटनास्थल पुगेको छ । घटनाको आवस्यक अनुसन्धान भइरहेको प्रहरीले जनाएको छ ।
त्यस्तै टोखा नगरपालिका–८ बानियाँटार गैरीगाउँ डेरा गरी बस्ने काभ्रे घर भएका २५ वर्षीय पासाङ लामा आफ्नै कोठामा सोमबार मृत अवस्थामा फेला परेका हुन् ।
यसैगरी काठमाडौँकै शंखरापुर नगरपालिका–५ खोरियास्थित खोल्सामा सोही नगरपालिका पालुबारी बस्ने ७५ वर्षीय माइला परियार सोमबार मृत अवस्थामा फेला परेका छन् । यस सम्बन्धमा प्रहरीले थप अनुसन्धान गरिरहेको जानकारी दिएको छ ।
त्यस्तै ताप्लेजुङको पाथीभरा याङवरक गाउँपालिका(२ बस्ने ५४ वर्षीया मिना लिम्बु सोही ठाउँस्थित काबेली नदीको किनारमा सोमबार मृत अवस्थामा फेला परेकी छिन् ।
आइतबार दिउँसोदेखि हराएकी उनको प्रहरी चौकी थेचम्बुबाट खटिएको प्रहरीले स्थानीयको सहयोगमा खोजी गर्न क्रममा उनको शव फेला पारेको हो ।
