अनलाइन डबली
काठमाण्डाै । इङ्ग्लिस प्रिमियर लिग फुटबलमा नटिङ्घम फरेस्टले आर्सनलसँग ५ गोल खाएको छ । गएराति भएको खेलमा आर्सनलले नटिङ्घम फरेस्टलाई ५–० गोल अन्तरले पराजित गरेको हो ।
योसँगै आर्सनल अङ्क तालिकाको पहिलो स्थानमा उक्लिएको छ । दोस्रो स्थानको म्यानचेस्टर सिटीसँग दुई अङ्कको अङ्क दूरी बढाउँदै आर्सनल फेरि शीर्ष स्थानमा उक्लिएको समाचार एजेन्सीहरुले बताएका छन् । शीर्ष स्थानमा रहेको आर्सनलको ३१ अङ्क भएको छ ।
म्यानचेस्टर सिटीको २९ अङ्क छ । आर्सनलको जितमा रेइस नेल्सनले दुई गोल गरे भने गाब्रियल मार्टिनेली, थोमस पार्टी र मार्टिन ओडेगार्डले एक-एक गोल गरे । नटिङ्घम फरेस्ट ९ अङ्क जोडेर पुछारमा रहेको छ।
यस्तै, गएराति नै भएको अर्को खेलमा म्यानचेस्टर युनाइटेड विजयी भएको छ । म्यानचेस्टर युनाइटेडले वेस्टह्यामलाई १–० गोल अन्तरले हराएको हो । १२ खेलमा २३ अङ्क भएको म्यानचेस्टर युनाइटेड तालिकाको पाँचौँ स्थानमा छ । वेस्टह्याम १३औँ स्थानमा छ ।
