अनलाइन डबलीसुर्खेत । आगामी मंसिर ४ गते हुन गइरहेको प्रतिनिधिसभा र प्रदेशसभा निर्वाचनको चहलपहल बढिरहेको बेला कालिकोटमा बम विस्फोट भएको छ । प्रहरीका अनुसार कालिकोटको तिलागुफा नगरपालिका–१० रानाबाडाँमा विष्फोट भएको हो । विस्फोटमा परी एक जनाको मृत्यु भएको छ भने चार जना घाइते भएका छन् ।
कालिकोट प्रहरीका अनुसार विस्फोटमा परी स्थानीय ४ वर्षीय झरना थापाको मृत्यु भएको छ भने ७ वर्षीय कमल थापा, ५ वर्षीय मुश्कान थापा, ४ वर्षीय सरस्वती थापा र ३ वर्षीय पखना थापा घाइते भएकाा छन् । गृहमन्त्रालयको पहलमा घाइतेहरुको थप उपचारको लागि नेपाली सेनाको हेलिकोप्टरबाट सुर्खेतस्थित प्रदेश अस्पताल ल्याइएको छ ।
शनिबार बिहान करिब ८ बजे भएको विस्फोट कसले र किन राखेको भन्ने नखुलेको प्रहरीले बताएको छ । चुनाव बहिस्कारमा रहेका समूहले बम राखेको हुन सक्ने भन्दै प्रहरीले अनुसन्धान गरिरहेको छ । त्यस्तै, विस्फोटक पदार्थ जनयुद्धकालिन अवस्थाका हो कि भन्नेबारे पनि अनुसन्धान भइरहेको बताइएको छ ।
नेपाली सेनाको टोली घटना स्थलतिर गएको छ । घटनास्थल वरपर थप विस्फोटक पदार्थको खोजी पनि भइरहेको छ ।
