![](https://onlinedabali.com/wp-content/uploads/2022/10/NAMS-Bir-Hospital.jpg)
काठमाडौँ । वीर अस्पतालका २ जना डाक्टरले अमानवीय हर्कत देखाएपछि उत्पन्न तनाव सल्टिएको छ ।
मंगलबार धादिङकी ३२ वर्षीय महिलामा प्रत्यारोपण गर्न निकालिएको दाताको मिर्गौला दुई डाक्टरले सम्बन्धित पक्षलाई जानकारी नै नगराइ अलपत्र छाडेर हिँडेका थिए ।
अस्पतालका प्रत्यारोपण सर्जन डा.पारसमणि नेपाल र डा.अनिल श्रेष्ठले मिर्गौला प्रत्यारोपण गर्न निकालिएको दाताको मिर्गौला त्यतिकै छाडेर हिँडेपछि त्यहाँ तनाव उत्पन्न भएको थियो ।
उक्त मिर्गौला प्रत्यारोपण घटनामा अस्पताल र बिरामी पक्षबीच तीन बुँदे सहमति भएको छ । बिहीबार अस्पतालमा भएको छलफलमा बिरामीको हालसम्मको उपचार खर्च मिनाहा गर्ने र आगामी दिनको उपचार पनि निशुल्क गर्ने अस्पताल र बिरामी पक्षबीच सहमति भएको हो ।
यस्तै पीडित पक्षले विस्तृत छानबिनको लागि स्वास्थ्य मन्त्रालय र नेपाल मेडिकल काउन्सिलमा निवेदन दिने र छानबिन समितिको प्रतिवेदनको पूर्ण कार्यान्वयन गर्ने सहमति भएको अस्पतालका निमित्त प्रमुख प्रशासकीय अधिकृत डा. भुपेन्द्र बस्नेतले जानकारी दिए ।
डाक्टर द्वय नेपाल र श्रेष्ठले ५८ वर्षीया महिलाको निकालिएको मिर्गौला काम नलाग्ने भएको भन्दै बिरामी र बिरामीका आफन्तलाई जानकारी नदिइ अस्पतालबाट हिँडेका थिए ।
यस घटनापछि बिरामीका आफन्त आन्दोलित भएका थिए। अस्पतालका प्रमुख डा.भुपेन्द्र बस्नेतले यसलाई अनपेक्षित घटना भएको प्रतिक्रिया दिए । घटनापछि अस्पतालका सिनियर सर्जन डा.प्रवीण श्रेष्ठको संयोजकत्वमा छानविन समिति गठन गरिएको थियो ।
उक्त समितिमा मेडिसिन विभागका प्रमुख डा.अशेष ढुंगाना, रेडियोलोजी विभागका प्रमुख डा.सरोज शर्मा, सीटीभीएस विभागका प्रमुख डा.दिनेश चापागाईँ, एनेस्थेसिया विभागकी डा.ऋतु प्रधान, प्रमुख नर्सिङ प्रशासक संगीता श्रेष्ठ र शाखा अधिकृत सीताराम खड्का रहेका छन् ।