अनलाइन डबली
काठमाडौं । कात्तिक महिनामा बैंकहरुको निक्षेपको ब्याजदर नबढ्ने भएको छ । नेपाल बैंकर्स संघको बिहीबार बसेको अनौपचारिक बैठकले कात्तिक महिनामा बैंकहरुले ब्याजदर नबढाउने निष्कर्षमा पुगेका हुन्।
असोज महिनामा बैंकहरुले निक्षेपको ब्याजदर बढाएसँगै चौतर्फी विरोध हुँदै आएको थियो । चौतर्फी विरोधपछि आगामी कार्तिक महिनामा भने व्याजदर नबढ्ने निष्कर्ष निकालेका हुन् ।
असोज महिनामा निक्षेपको ब्याजदर व्यक्तिगत मुद्दतीतर्फ ११.०३ प्रतिशतबाट बढाएर १२.१३ प्रतिशत पुर्याइएको थियो । अब कात्तिक महिनाको लागि पनि यही दर कायम रहने भएको छ । त्यस्तै, रेमिट्यान्स मुद्दती तर्फ १३.१३ प्रतिशत न्यूनतम ब्याजदर कायम रहेको छ ।
असोज महिनामा बैंकहरुले ब्याजदर वृद्धि गरे पनि बैंकहरुमा पैसा भने आएको देखिँदैन । नेपाल बैंकर्स संघले सार्वजनिक गरेको पछिल्लो एक साताको तथ्यांकमा बैंकहरुमा निक्षेप घटेको देखिन्छ ।
