अनलाइन डबली
काठमाडौं । नेकपा एमाले अध्यक्ष केपी शर्मा ओलीलाई चुनौती दिँदै चुनावी मैदानमा उत्रिएका लेखक तथा राजनीतिक विश्लेषक युग पाठकले पुतली चुनाव चिह्न पाएका छन् । झापा ५ बाट प्रतिनिधिसभा सदस्य पदमा स्वतन्त्र उम्मेदवारी दिएका युग पाठकलाई निर्वाचन आयोगले बुधबार पुतली चुनाव चिह्न दिएको छ ।
ओलीलाई हराउनु पर्ने अभिायनमा लागेका पाठक चुनाव चिह्न पाएसँगै चुनावी अभियान सुरु गरेका छन् । सोही क्षेत्रबाट सत्ता गठबन्धनको समर्थनमा कांग्रेसका खगेन्द्र पाण्डव अधिकारी मैदानमा छन् । ओलीलाई राप्रपाले साथ दिएको छ ।
यसैबीच एमाले परित्याग गरेर स्वतन्त्र उम्मेदवारी दिएका नेता घनश्याम भुसालले चुनाव चिह्न त्रिभुज पाएका छन् । एमालेले टिकट नदिएपछि सत्ता गठबन्धनको समर्थनमा भुसालले उम्मेदवारी दिएका थिए । उनले एमाले सचिव छविलाल विश्वकर्मालाई चुनौती दिएका छन् ।
यसैबीच एमालेबाट स्वतन्त्र उम्मेदवारी दिएकी गंगा चौधरीले चुनाव चिन्ह लौरो पाएकी छन् । एमालेले टिकट नदिएपछि गंगाले विद्रोह गरी दाङ क्षेत्र नम्बर १ बाट उम्मेदवारी दिएकी छन् । एमाले शान्ता चौधरीलाई टिकट दिएको छ । सत्तगठबन्धनबाट सो क्षेत्रमा एकीकृत समाजवादीका मेटमणी चौधरी मैदानमा छन् ।
यसैबीच एमालेको टिकट परित्याग गरेर स्तवन्त्र उम्मेदवारी दिएका पूर्व माओवादी नेता प्रभु साहले चुनाव चिह्न ह्याण्ड पाइप (हातेकल) पाएका छन् । साहले रौतहट ३ बाट प्रतिनिधिसभा सदस्य पदमा स्वतन्त्र उम्मेदवारी दिएका छन् ।
