अनलाइन डबली
काठमाडौँ । नेपाली कांग्रेसका महामन्त्री गगन थापाले काठमाडौं ४ बाट प्रतिनिधिसभा सदस्यमा उम्मेदवारी दर्ता गराएका छन् । आइतबार दिउँसो निर्वाचन अधिकृतको कार्यालय बूढानीलकण्ठमा उनले मनोनयन दर्ता गराएका हुन् । मनोनयन दर्तापछि थापाले ड्राइभिङ सिटमा अब आफैं बस्ने प्रतिक्रिया दिए।
‘ड्राइभिङ सिटमा अब आफैं बस्ने हो । अब आउने पाँच वर्ष आफैं ड्राइभिङ सिटमा बसेर मूल दायित्व लिने प्रयत्न गर्ने हो । फल कस्तो आउँछ, समयले बताउला,’ थापाले भने । सरकार तथा पार्टीको मूल नेतृत्व गर्ने जोश र आवश्यक अनुभव भएको उनको भनाइ छ ।
काठमाडौं ४ ले आफूलाई पहिचान दिएको भन्दै अन्य क्षेत्रमा उम्मेदवार बन्न नगएको बताए । ‘यो ठाउँबाट प्रतिनिधित्व गर्न पाउँदा मलाई गौरव लाग्छ। यहाँको माटोले मलाई बाँधेको छ,’ थापाले भने, यो क्षेत्रका लागि मैले गर्ने भन्दा पनि यो ठाउँले नै मलाई धेरै पहिचान दिएको छ। हुर्कन दिएको छ। त्यसैले अन्तबाट निमन्त्रणा हुँदा पनि गइनँ ।’
यता काठमाडौं प्रतिनिधिसभा निर्वाचन क्षेत्र नम्बर ५ मा बहुपक्षीय भीडन्त हुने देखिएको छ । आगामी मंसिर ४ गते हुने निर्वाचनमा एमालेका वरिष्ठ उपाध्यक्ष ईश्वर पोखरेल, कांग्रेसका नेता प्रदीप पौडेल, अर्थशास्त्री एवम् शिक्षासेवी प्राडा गोपीलाल न्यौपाने र युवाहरुबीच लोकप्रिय रञ्जु दर्शनाबीच प्रतिस्पर्धा हुने भएको हो ।
आइतबार मनोनयन दर्ता गराएपछि पोखरेलले नेकपा एमालेले जनताको हीतका लागि काम गरेकाले चुनाव जित्नेमा विश्वस्त रहेको बताए । सञ्चारकर्मीहरुसँगको कुराकानीमा नेता पोखरेलले नेकपा एमालेले गत ५ वर्षमा जनताको प्रतिष्ठामा आँच आउने कुनै काम नगरेको भन्दै जनतासँग पार्टीका विचार बोकेर जाने बताए ।
उनले भने, ‘जनताको हीतमा हामीले यो ठाउँमा धेरै काम गरेका छौँ । धेरै समस्यालाई समाधान गर्ने कुरामा केन्द्रित भएर काम गर्दै आएका छौँ । गठबन्धन हामीले स्थानीय तहको निर्वाचनमा पनि देख्यौँ । नेकपा एमालेको राजनीतिक प्रतिष्ठा जनताको बीचमा जुन छ, त्यो प्रतिष्ठामा आँच पुग्ने कुनै गतिविधि भएका छैनन् । हामी हाम्रा विचार लिएर आएका छौँ । हामीले हिजोको भन्दा पनि थप हाम्रो अवस्थालाई सबल बनाएका छौँ ।’
त्यस्तै काठमाडौं क्षेत्र नम्बर ५ बाट नै सत्तारुढ गठबन्धनको उम्मेदवार बनेका नेपाली काँग्रेसका नेता पौडेलले संघीय राजधानी, राजधानी जस्तो नभएकाले राजधानी बनाउन आफ्नो उम्मेदवारी रहेको बताए ।
उनले मुलुकलाई स्थिरता र सुशासन दिनका लागि आफ्नो उम्मेदवारी भएको बताए । उनले सुशासन कायम गर्ने, भ्रष्टाचार शुन्य गर्ने, नागरिकको विकासका लागि काम गर्ने प्रतिवद्धता समेत जनाए । नेता पौडेलले गठबन्धनका प्रतिनिधिलाई चुन्दा पछुताउनुपर्ने अवस्था नआउने दाबी गरे ।
उनले भने, ‘यो राजधानीको केन्द्र हो, यहाँ हुने गतिविधिले देशलाई सन्देश प्रवाह गर्छ । यो मुलुकमा सुशासन कायम गर्नको निम्ति कतै खोट नदेखिने गरेर काम गर्नेछौँ । शुसाशन कायम गर्ने, भ्रष्टाचार शुन्य गर्ने, नागरिकको विकासका लागि हामी काम गर्नेछौँ । राजधानी राजधानी जसरी विकास हुन सकेको छैन । हामीलाई प्रतिनिधि बनाउँदा जनतालाई पछुताउनुपर्ने अवस्था आउने छैन ।’
काठमाडाैं क्षेत्र नम्बर ५ बाट नै प्राडा गोपीलाल न्यौपाने, रञ्जु दर्शना र कलाकार मधुसुदन पाठकले पनि स्वतन्त्र उम्मेदवारको रुपमा मनोनयन दर्ता गराएका छन् ।
