अनलाइन डबली
काठमाडौं । सरकारले आजबाट दशैं बिदा दिएको छ । सरकारी कार्यालय बिदा भएसँगै घर फर्किनेको भिड हिजो अस्तीभन्दा बढेको छ । शुक्रबार सरकार कार्यालयसँगै निजि कार्यालय पनि बन्द भएका छन् । घटस्थापनादेखि केही शैक्षिक संस्था बन्द भइसकेका थिए भने हिजोबाट पूर्णरुपमा बन्द भएका छन् ।
आज शनिवार र भोलि फूलपाती भएकाले अत्यावश्यक बाहेकका कार्यालय र सेवा आजदेखि बन्द भएका छन् । शुक्रबार कार्यालय हाजिर गरेर कतिपय मानिसहरु हिडिसकेका छन् भने आज र भोलि घर फर्किनेको धेरै भिड बढेको प्रहरीले बताएको छ । जागिर र पढाईलगायतका कामले घर छोडेकाहरु दशैंमा घर फर्किने हुँदा गाउँमा चहलपहल बढेको छ । त्यस्तै विदेश गएकाहरु पनि घर फर्किरहेका छन् ।
काठमाडौं उपत्यकाबाट मात्रै २० देखि २५ लाख मानिसहरु बाहिरिने ट्राफिक प्रहरीले जनाएको छ । यात्रुले टिकट काट्ने र बस चढ्ने कलङ्की, स्वयम्भू, माछापोखरी, नयाँ बसपार्क, चाबहिल, गौशाला, कोटेश्वर, जगाती, सातदोबाटो, बल्खु, दक्षिणकाली, सुन्धारा र पुरानो बसपार्कमा घर फर्किनेको विहानैबाट भिड लागेको छ । यी स्थानमा प्रहरीले सहायता कक्ष पनि राखेको छ ।
भिडभाडको यात्रा असुरक्षित हुने भएको बताउँदै प्रहरीले ध्यान दिन आग्रह गरेको छ । प्रहरीले छतमा नचढ्न, गाडीमा नझुन्डिन र कसरी यात्रा गर्दा सुरक्षित हुन्छ त्यसतर्फ आफैँ सचेत रहन सबै यात्रुसँग आग्रह गरेको छ । यस्तै गाडीकाे चाप र भिडभाडका कारण हुनसक्ने चोरी र पाकेटमार नियन्त्रण, क्षमताभन्दा बढी चढाउने गाडीलाई कारबाही गर्न सादा पोसाकमा पनि प्रहरी खटिएको प्रहरी प्रधान कार्यालयले जनाएको छ । तोकिएकोभन्दा बढी भाडा नलिन र ट्राफिक नियमको पालना गर्न प्रहरीले यातायात व्यवसायीसँग आग्रह गरेको छ ।
दशैँमा मानिसहरु बाहिरिने भएकाले काठमाण्डाै उपत्यकामा भिडभाड कम हुने भएकाले मानिसको चाप कम भए पनि चोरी लगायतका घटना हुन सक्ने भएकाले सुरक्षा व्यवस्थामा कडाइ गरिएको प्रहरीले जनाएको छ । मोबाइल गस्ती, पैदल गस्ती, पिकेट, क्यूआरटी, सादा पोसाकका प्रहरीको परिचालन, सीआरभी, सीसीटीभी निगरानी, कट एन्ड सर्च, एम्बुस, रिजर्भ, नियमित चेक प्वाइन्ट ड्यूटी, मापसे चेकिङमा प्रहरी खटाइने छ।
