अनलाइन डबली
काठमाडौँ । रुसी महासंघका राष्ट्रपति भ्लादिमिर पुटिनले युक्रेनका चार क्षेत्र रुसमा गाभिएको घोषणा गर्दै ती क्षेत्रको सुरक्षा गर्ने प्रतिबद्धता समेत जनाएका छन् । शुक्रबार मस्कोमा आयोजित विशेष कार्यक्रममा राष्ट्रपति युक्रेनका लुहान्स्क, डोनेट्स्क, जापोरिजिया र खेरसन क्षेत्र रुसमा गाभिएको घोषणा गरेका थिए ।
उक्त कार्यक्रममा बोल्दै पुटिनले ती क्षेत्रमा बसोवास गर्ने मानिसहरूले रुसमा गाभिने चाहना व्यक्त गरेको भन्दै ती क्षेत्र रुसी महासङ्घको नयाँ क्षेत्र भएको समेत बताए । ती क्षेत्रका सुरक्षा जिम्मा रुसी सेनाले लिने बताउँदै पुटिनले कसैले पाइला टेके युद्धको घोषणा हुने संकेत समेत गरेको अन्तर्राष्ट्रिय संचारमाध्यमहरुले जनाएका छन् ।
कार्यक्रममा रुसले त्यस क्षेत्रमा नियुक्त गरेका चार जना अधिकारीहरूले विलयसम्बन्धी सम्झौतामा हस्ताक्षर गरेका थिए । कार्यक्रममा राष्ट्रपति पुटिनले सोभियत सङ्घलाई पुनःस्थापित गर्न नखोजेको तर रुसी भूमीको रक्षा गर्ने समेत बताए ।
सन् १९९१ मा सोभियत सङ्घ विघटनपछि युक्रेन देशको रूपमा उदाएको थियो । गएको फेब्रुअरी २४ मा रुसले युक्रेनमा विशेष सैन्य कारवाही सुरु गरेको थियो । राष्ट्रपति पुटिनले रुसले सबै तरिकाबाट आफ्नो नयाँ भूभागको बचाउ गर्ने र ती नयाँ क्षेत्रहरूमा सुरक्षा बढाउने बताएका छन् । पुटिनले रुसी राजनीतिज्ञ र सेनाको भेला समेत गरेका छन् । उनले युक्रेनलाई सैन्य कारबाही रोक्न र वार्ताको टेबुलमा फर्किन आह्वान पनि गरेका छन् ।
भतर संयुक्त राष्ट्रसङ्घ, युक्रेन र उसका साझेदारहरूले ती जनमतसङ्ग्रहलाई गैरकानुनी भन्दै आलोचना गरेका छन् । तर, सो क्षेत्रका नागरिकले ९९ प्रतिशत मत रुससँग गाभिने पक्षमा व्यक्त गरेका थिए ।
रुसले लुहान्स्क र डोनेट्स्कलाई सैन्य कारवाह सुरु गर्नुको तीन पहिले नै स्वतन्त्र जनगणराज्यको मान्यता दिइसकेको थियो भने खरसन र जापोरिजिया कारवाही सुरु गरेको केही हप्तामै रुसी सेनाले कब्जामा लिइसकेको थियो । युक्रेनको यी क्षेत्र सामरिक हिसाबले निकै महत्वपूर्ण रहेका छन् । यी क्षेत्र गुमाउनु भनेको युक्रेनको लागि ठूलो क्षति हो ।
