अनलाइन डबली
काठमाडौं । सुदूरपश्चिम प्रदेशमा भारी बर्षा हुने जल तथा मौसम पूर्वानुमान महाशाखाले जनाएको छ । मौसमविद् हिरा भट्टराईका अनुसार आज राति सुदूरपश्चिम प्रदेशका अधिकांश भागमा भारी बर्षा हुनेछ । भारतको राजस्थानमा बनेको न्यून चापीय क्षेत्रको प्रभावका कारण आज राति १२ बजेदेखि सुदूरपश्चिम प्रदेशका सबैजसो ठाउँमा ठूलो पानी पर्ने र कुनैकुनै ठाउँमा अझ ठूलो पानी पर्ने सम्भावना रहेको भट्टराईले बताए ।
भट्टराईका अनुसार आज राति १२ बजेदेखि कैलाली, कञ्चनपुर क्षेत्रबाट यसका प्रभाव पर्न सुरु भएर भोलि बिहानसम्म सुदूरपश्चिम क्षेत्र र कर्णाली प्रदेशका पूरै भूभागमा प्रभाव पर्नेछ । त्यसपछि दिउँसोसम्ममा लुम्बिनी प्रदेशका केही ठाउँमा पनि प्रभाव पर्ने र ठूलो पानी पर्ने भट्टराईले जानकारी दिएका छन् ।
देशका अरु ठाउँमा भने सामान्य प्रभाव मात्रै रहनेछ । अरु ठाउँमा सामान्यदेखि मध्यम खालको पानी पर्ने सम्भावना रहेको छ । भोलि बेलुकासम्म नै न्यून चापीय क्षेत्रको प्रभाव रहने भएकाले भिरालो ठाउँमा पहिरो तथा नदीमा बाढी आउने सम्भावना भएकाले भिरालो जमिन र नदी आसपासको क्षेत्रका नागरिकलाई विशेष सतर्कता अपनाउन आग्रह गरिएको छ ।
एक हप्ताअघि मात्रै भारी बर्षासँगै सुदूरपश्चिम प्रदेशमा ठूलो जनधनको क्षति भएको थियो । अछाममा गएको बाढी पहिरोबाट २२ जनाको मृत्यु भएको थियो भने दुई दर्जनभन्दा बढी घाइते भएका थिए । त्यस्तै कैलाली, कञ्चनपुरमा बाढीले धेरै बस्ती डुवानमा परेका थिए भने अन्य पहाडी जिल्लामा पहिरोले क्षति पुगेको थियो ।
