अनलाइन डबली
काठमाडौँ । रुसले युक्रेनमा जारी विशेष सैन्य अभियानमा आफ्ना मृतक सैनिकको संख्या सार्वजनिक गरेको छ । युक्रेन र पश्चिमा देशहरुले विभिन्न संख्या बताइरहेको बेला रुसले औपचारिक रुपमा मृतक सैनिकको संख्या सार्वजनिक गरेको छ । ३ लाख रिजर्भ फोर्स परिचालन गर्ने घोषणा गरेलगत्तै रुसले औपचारिक रुपमा युक्रेनमा मारिएका सैनिकको संख्या सार्वजनिक गरेको हो ।
टेलिभिजनमा बोल्दै रुसी रक्षा–मन्त्री सर्गेई शोइगुले द्वन्द्व सुरु भएदेखि हालसम्म ५ हजार ९३७ रूसी सैनिक मारिएको जानकारी दिए । रक्षामन्त्री शोइगुले सात महिना लामो ‘विशेष सैन्य अपरेशन’ मा रुसले ठूलो नोक्सानी बेहोरेको कीभ र पश्चिमा राष्ट्रहरूको भनाइलाई खारेज गरेको अन्तर्राष्ट्रिय संचारमाध्यमहरुले बताएका छन् ।
उनले ९०% घाइते रुसी सैनिकहरू युद्ध मोर्चामा फर्किएको समेत बताए । राष्ट्रपति भ्लादिमिर पुटिनले दोस्रो विश्वयुद्धपछि पहिलोपटक रुसी रिजर्भ फोर्स परिचालन गर्न आदेश दिएसँगै विश्वभर नयाँ तरंग फैलिएको बेला यो संख्या सार्वजनिक भएको छ ।
रुसले मृतक सैनिकको संख्या औपचारिक रुपमा सार्वजनिक भएको यो दोस्रो पटक हो । सैन्य कारवाही पछि मार्च २५ मा रुसले आफ्ना १ हजार ३ सय ५१ सैनिक मारिएको बताएको थियो । त्यसपछि रुसी सेनाको हताहतीबारे पश्चिमबाट विभिन्न अनुमान आइरहँदा पनि रुसले विवरण सार्वजनिक गरेको थिएन ।
अगस्टमा अमेरिकी रक्षा मन्त्रालय पेन्टागनले युक्रेन युद्धमा रुसी पक्षका करिब ७० देखि ८० हजार सैनिक मारिएको वा घाइते भएको प्रक्षेपण गरेको थियो । तर हाल रुसले सार्वजनिक गरेको सैन्य हताहतीको संख्या पेन्टागनको प्रक्षेपणभन्दा निकै कम देखिन्छ ।
युक्रेनमा कयौं पश्चिमी शक्ति विरुद्ध एकैपटक लड्नु परेकाले थप जनशक्ति आवश्यक परेको र त्यसैका लागि रिजर्भ फोर्स परिचालन गर्नुपरेको पुटिनले बताए । रक्षा मन्त्री शोइगुले रुससँग २ करोड ५० लाख सम्भावित लडाकू रहे पनि हाल ३ लाख पुरुष मात्र परिचालित हुने बताए ।
क्रेमलिनको वेबसाइटमा प्रकाशित अध्यादेश अनुसार हाल बोलाइएको रिजर्भ फोर्समा पहिले नै सैन्य अनुभव भएकाहरुलाई मात्र परिचालित गर्ने भनिएको छ । शोईगुले युक्रेनमा तैनाथ गर्नुअघि उनीहरूलाई थप प्रशिक्षण दिइने बताए । मस्कोले आफ्नो छिमेकीलाई निशस्त्रीकरण गर्न र खतरनाक राष्ट्रवादीहरुबाट मुक्त बनाउन विशेष सैन्य अभियान चलाएको बताइरहेको छ ।
